چیئرمین فیڈرل بورڈ آف ریونیو سید شبر زیدی نا پاکستان انوویٹو فنانس فورم آن تران

ایف بی آر چنکا و درمیانہ درجہ نا مون آ دننگ کن تینا کڑد ءِ ادا کننگ ءِ
اسلام آباد۔ 26نومبر (اے پی پی) فیڈرل بورڈ آف ریونیو (ایف بی آر) نا چیئرمین سید شبر زیدی پارینے کہ ایف بی آر چنکا و درمیانہ درجہ نا مون آ دننگ کن تینا کڑد ءِ ادا کننگ ءِ، خراج دوست چاگڑد نا فراوانی ننا عزم ءِ، ایف بی آر و ایس ایم ایز نا بشخ اٹی پت انا کمتی ءِ چٹفنگ آ چکار کننگ اُن۔ داخیال آتا درشانی ءِ او سے شنبے نادے آ داڑے پاکستان انوویٹو فنانس فورم آن تران کرسا کرے۔ فورم نا بست و بند ءِ کار انداز پاکستان، بل اینڈ ملینڈا گیٹس فاؤنڈیشن، یوکے ایڈ و ایشیائی شونداری بینک اواری اٹ کریسر۔ چیئرمین ایف بی آر پارے کہ ملک انا زرگزران اٹی چنکا و درمیانہ درجہ نا صنعت و کاروبار نا بشخ 30 درسد نا خڑک ءِ ولے دانا زیات تر بشخ دستاویزی اف ہرانا سوب آن دا بشخ ءِ مالیاتی خذمت آتا جوان وڑاٹ فراوانی مفننگ ءِ، گرج دا ہیت انا ءِ کہ دادے خراج نا نظام نا بشخ جوڑ کننگے۔ چیئرمین ایف بی آر نا پاننگ ئس کہ بجلی نا صنعتی و واپاری صارف آتا کچ 31لکھ ءِ ہرافتیان بیرہ 43ہزار سیلز خراج ادا کننگ ءُ، ہراوخت اسکان او دستاویزی زرگزران نا بشخ مفسہ ہمووخت اسکان اوفتے گچین مالیاتی خذمت فراوان مننگ کپک۔ سید شبر زیدی پارے کہ ایس ایم ایز و ایف بی آر نا نیام اٹ پت انا کمتی نا چٹفنگ کن نن تینا کوشست آتے برجاتخانن، پت انا کمتی نا سوب آن ایس ایم ایز خراج نظام نا بشخ مفک۔ اوپارے کہ مینو فیکچرنگ نا بشخ اتون گنڈوک ایس ایم ایز ملکی زرگزران اٹی تمبہ نا حیثیت تخک۔ مستین اٹی اونا خراج نا نظام اٹی پالیسی تا سوب آن او خراج نیٹ آن پیشن رہینگ انگ ءِ پسند کریرہ،، سنگل خراج نا کانود ہم اسہ اہم ءُ ویل اس مسنے ہرا بھلا و چنکا ہڑتوم آ کاروبار تیا لاگومریک۔ داسوب آن خراج دوست چاگڑد فراوان مننگ کتنے۔ ایف بی آر دارداٹ تینا کڑد ءِ ادا کننگ ءِ، نن چنکا و درمیانہ درجہ نا صنعت و کاروبار کن خراج کانود ءِ آسان کننگ اُن۔ داوخت آ مائیکرو پیمنٹ گیٹ وے انا رداٹ مفاہمت نا دستاویز آتیا دستخط کننگا۔ معاہدہ غا کارانداز نا چیف ایگزیکٹو آفیسر علی سرفراز و سٹیٹ بینک آف پاکستان نا سہیل جاوید دستخط کریر۔ مفاہمت نا دستاویز آن ایس ایم ایز نا فنانشل انکلوژن و ادائیگی تا پنجر اٹی نمان گچینی بریک۔ داوخت آ ہالینڈ نا ملکہ میکسیما و پاکستان اٹی برطانیہ نا ڈپٹی ہائی کمشنر ئسک ہم ساڑی ئسر۔