اسپیکر قومی اسمبلی اسد قیصر نا بیلا روس نا نائب وزیر خارجہ تون اوڑدہی ٹی گپ و تران

اسلام آباد۔ 26نومبر (اے پی پی) اسپیکر قومی اسمبلی اسد قیصر تون سے شنبے نادے آ پارلیمنٹ ہاؤس اٹی بیلا روس نا نائب وزیر خارجہ اوڑدہی کرے ہراٹی ہڑتوم آ کنڈآتا تعلقداری تتون اوار اہم علاقائی و جہانی معاملہ غاتیا گپ و تران کننگا۔ داوخت آ اسپیکر قومی اسمبلی اسد قیصر نائب وزیر خارجہ تون گپ و تران کرسا پارے کہ پاکستان بیلاروس تون تینا متکن آ دوستانہ تعلقداری تے بے کچ اہمیت ایتک۔ پاکستان بیلاروس تون پارلیمانی و اقتصادی کمکاری ءِ مون آ دننگ نا است خواہ ءِ۔ ہڑتوم آ ملک آتا نیام اٹ ساڑی تعلقداری ءِ پین مون آ دروئی مریک۔ اوپارے کہ بیلا روس نا پارلیمان تون رابطہ غاتے مون آ دننگ اٹ بھاز است خواہی تخنہ۔ ہڑتوم آ ملک آتا پارلیمان نا باسک آتے ٹی رابطہ ہڑتوم آ قوم تے خڑک اتنگ اٹ اہم کڑد ادا کننگ کیرہ۔ پارلیمانی رابطہ غاتے مون آ دننگ کن فرینڈ شپ پڑک اس جوڑ کننگا۔ اسد قیصر پارے کہ پاک بیلا روس فرینڈ شپ پڑک تعلقداری تے مون آ دننگ کن فعال کڑد ادا کننگ ءِ۔ ہڑتوم آ ملک آتے ٹی اقتصادی کمکاری ءِ مون آ دننگ نا چندی معاہدہ غاک طے مسنو ہڑتوم آ ملک آتا سیاسی سرکڑدہ و واپاری برادری نا نیام اٹ رابطہ غاتیان تعلقداریک سوگو مسنو۔ اوپارے کہ سی پیک ڈٹ ڈیہہ نا معاشی شونداری و شونہالی ٹی مزل نا نشان مریک۔ سی پیک ڈٹ آن ڈیہہ نا ملک آتا نیام اٹ واپار اٹی ودکی مریک و روزگار نا پوسکن ءُ وارخواہی ودی مریک۔ پاکستان سی پیک ڈٹ انا زوت پوروی ءِ خواہک۔ ڈٹ ءِ ڈیہہ نا ایلو ملک آتون ودفنگ نا خواہندار ءِ۔ اوپارے کہ پاکستان بیلا روس اتون کشت وکشار، صنعت، ٹیکسٹائل، واپار و دفاع نا بشخ آتے ٹی کمکاری ءِ ودفنگ خواہک۔ ہڑتوم آ ملک آتا نیام اٹ طے مروک آ معاہدہ غاتیا عملدرآمد ءِ پک کننگ کن ہروڑکمک فراوان کننگ کن تیار اُن۔ بیلا روس نا نائب وزیر خارجہ پارے کہ بیلا روس پاکستان تون تعلقداری تے قدر انا نظر اٹ ہرک۔ پاکستان ہمو اولیکو ملک ءِ ہرا بیلا روس ءِ امنا کرے۔ اوپارے کہ وزیراعظم عمران خان نا ساڑی آ دورہ بیلا روس ہڑتوم آ ملک آتا نیام اٹ تعلقداری تے سوگو کننگ اٹ اہم پیش رفت ءِ۔ پاکستان نا ڈیہہ ٹی امن و سوگوی کن کوشست آک ستاکڑزرہ۔ اوپارے کہ ہڑتوم آ ملک آتا سیاسی و پارلیمانی سرکڑدہ غاتے ٹی رابطہ ہڑتوم آ کنڈآتا تعلقداری تے ودفنگ اٹ اہم کڑد ادا کننگ کیک۔ بیلا روس پاکستان تون غٹ راجی و اقتصادی بشخ آتے ٹی کمکاری ءِ ودفنگ نا خواہش مند ءِ۔