وزیراعظم آزاد کشمیر راجہ فاروق حیدر نا انٹرنیشنل کشمیر سیمینار آن تران

اسلام آباد۔ 26نومبر (اے پی پی) وزیراعظم آزاد کشمیر راجہ فاروق حیدر پارینے کہ کشمیریک پاکستان نا مخ تفی ءِ وخت اس ہم فراموش کننگ کپسہ، کشمیریک بھارت نا 5 اگست نا گام گیج ءِ امنا کتنو، بھارتی فوج مقبوضہ کشمیر اٹی انسانی حقءِ پش پش کرینے، کشمیری تا جوزہ ءِ وخت اس ہم شکست تننگ مفک، کشمیریک یا تو چٹرہ یا بھارت ءِ چٹفسا ساہ ہلور۔ بھارت نا پیلٹ گنز، نسل کشی، ٹارچر، برمتہ، دوران حراست بیدادی و مرک کشمیریک غٹ انا مقابلہ ءِ کرینو، کشمیری تے مودی نا سفاکیت نا مون تروک ءِ۔ داخیال آتا درشانی ءِ او سے شنبے نادے آ انٹرنیشنل کشمیر سیمینار آن تران کرسا کرے۔ وزیراعظم آزاد کشمیر پارے کہ پاکستان نا مخ تفی ءِ کشمیریک وخت اس ہم فراموش کننگ کپسہ۔ کشمیریک بھارت نا 5 اگست ءِ امنا کتنو۔ بھارت نا کنڈآن ریاست کشمیر ءِ بشخنگ جہانی کانود نا خلاف ورزی ءِ۔ اقوام متحدہ نا قرارداد و جنیواکنونشن نا رداٹ بھارت نا برخلاف کشمیری تا جہد آجوئی جائز ءِ۔ راجہ فاروق حیدر پارے کہ بھارتی فوج ایل او سی آ ہم سویلینز نا زند ءِ مشکل جوڑ کرینے۔ بھارت کنٹرول لین آ پدریسہ گولہ باری کننگ ءِ۔ نن جہانی برادری ءِ پارینن کشمیری بھارت نا گام گیج ءِ امنا کپسہ۔ کشمیری تے تینٹ تینا مقدمہ ءِ پیش کننگ نا موقع تننگے۔ اوپارے کہ ننے دنیا نا حقیقت آتے امنا کروئی تمک۔ ننے بھارت نا پروپیگنڈا نا توڑ اس کروئی مریک۔ کشمیری بھارت ءِ شکست ایترہ۔ کشمیرننکن زند و مرک انا ویل ءِ۔ اوپارے کہ اہم ملک آتے کشمیر آ متحرک کننگے۔ بھارت امریکہ نا حلیف ءِ، نن بایدے دا حقیقت ءِ پہہ مرین، یورپی یونین اٹی مقدمہ ءِ تالان کننگے۔ اوپارے کہ بھارت نا ہدف پاکستان ءِ۔ نن پاکستانی اُن ننے آن زیات پاکستان نا ہچ ءُ خیر خواہ اس اف۔ نظریہ پاکستان ہی ننا اساس ءِ۔ وزیراعظم آزادکشمیر پارے کہ پاکستان ننااومیت و عقیدت آتا مرکز ءِ۔ ہندوستان نا بالادستی ءِ توننگ کن پاکستانی آہنی دیوال اسے۔