صدر ءِ مملکت ڈاکٹر عارف علوی ءِ زالبول آنی ھلاپ ءَ لٹ ءُُ لٹ کاری ءِ ھلاس کنگ ءِ میاں اوستمانی روچ ءِ درگت ءَ مراگش ءَ گوں گشتانک

اسلام آباد ۔ 25 نومبر (اے پی پی)صدر مملکت ڈاکٹر عارف علوی ءَ گوشت کہ زالبول آنی لٹ ءُُ لٹ کاری ءِ ھلاسی ءِ واستہ کانود جوڑ کنگ ءُُ چاگردی مٹ ءُُ بدلی المی انت، مارا ھمک رنگ ءِ لٹ ءُُ کُٹ ءَ را ھراب لیکگی انت ۔ اے ھیالانی درشانی آئی ءَ زالبول آنی ھلاپ ءَ لٹ ءُُ کُٹ ءِ ھلاسی ءِ روچ ءِ درگت ءَ ایوان ءِ صدر ءَ برجم داشتگیں مراگش ءَ گشتانک دیان ءَ کت ۔ آئی ءَ گوشت کہ پاکستان ءَ اے ھوالگ ءَ کانود وا است انت بلے ایشی ءِ پد ءُُ رند کنگ ءِ ضلورت انت ۔ آئی ءَ گوشت کہ مارا چاگردی تک ءَ اے جیڈھ ءِ سر ءَ سسا کنگی انت ءُُ ایشرا ھمک تک ءَ سہرا کنگ لوٹ ایت ۔ آئی ءَ میڈیا ءِ کرد ءِ ھوالگ ءَ گوشت کہ آ چاگرد ءِ زالبول ءُُ زھگ آنی ھلاپ ءِ لٹ ءُُ کٹ ءَ را گر ءُُ دار ءِ واستہ چاگرد ءِ اند ر ءَ سرپدی پیداک کنگ ءَ ارزشتی ایں کرد پیلو کت کنت چیا کہ اے وڑیں جیڈھ آنی سر ءَ الس ءَ را سرپدی المی انت ۔ مارا اے جیڈھ ءِ سر ءَ تران کنگ لوٹ ایت ءُُ ھمک رنگ ءِ لٹ ءُُ کٹ ءَ را ھراب لیکگی انت ۔ آئی ءَ 188ملک آنی تہ ءَ پاکستان ءِ 164نمبر ءِ آیگ ءِ پد ءَ جھلانکیں دلپدردی ءِ درشان کت ۔ آئی ءَ چاگرد ءَ زالبول آناں آوار جنگ ءِ گیش بوھوکیں کیس آنی تران ءَ کنان ءَ اے ھوالگ ءَ کانود ءِ پد ءُُ رند کنگ ءِ سر ءَ زور پر دات ۔ آئی ءَ میراس ءِ ھک ءَ ھوار زالبول آناں مالی رنگ ءَ وت سروک جوڑ کنگ ءِ ھم کمک کت ءُُ گوشت کہ ایشی ءَ چہ زالبول آنی لٹ ءُُ کُٹ ءِ واکیہ آناں کم کنگ ءَ کمک رس ایت ۔ بنجاھی وزیر برائے کانود ءُُ انصاف بیرسٹر فروغ نسیم ءَ ھم مراگش ءَ گشتانک دات ۔