روڈ ٹو مکہ پروجیکٹ ءِ ملک انا ایلو شار تسکان ودفنگ نا خواہندار اُن، ڈاکٹر نور الحق قادری

اسلام آباد۔ 25نومبر (اے پی پی) بنجائی وزیر مذہبی امور ڈاکٹر نور الحق قادری پارینے کہ گچین تربیتی پروگرام نا کمک اٹ حج بست وبند آتے پین گچین کننگ اٹ کمک رسینگک، روڈ ٹو مکہ پروجیکٹ ءِ اینخو نا سال ملک انا ایلو شار تسکان ودفنگ نا خواہندار اُن۔ دوشنبے نادے آ حاجی کیمپ اسلام آباد اٹی پنچ می حج سلابتی ورکشاپ حج 2020 ء آن تران کرسا نور الحق قادری پارے کہ حاجی تا تربیت آ خصوصی چکار کننگ اُن، گچین تربیت آن حاجی تا ویل آتے ٹی کمتی بریک و حج بست و بند آتے پین گچین کننگ اٹ کمک رسینگک۔ اوپارے کہ تدوک آ سال ہم اسہ لکھ آن زیات عازمین حج آتے تربیت تننگا۔ اوپارے کہ حاجی تا ویل آتا ایسری کن سعودی وزارت حج تون ہیت کینہ۔ اوپارے کہ تدوک آ سال اسلام آباد آن روڈ ٹو مکہ پروجیکٹ نا بناءِ کننگاسس، ننا است خواہی ءِ کہ روڈ ٹو مکہ پروجیکٹ ءِ ملک انا ایلو شار تسکان ودفنگے۔ نور الحق قادری کُننگ نا بابت گڑاس غاوتا پیدواری آ پارے کہ حکومت دا معاملہ غا خصوصی چکار کننگ ءِ۔ تدوک آ سال ہم گچین بست و بند کننگاسس ولے اوفتے پین گچین کننگک۔ اوپارے کہ پرخ بیرہ چس انا ءِ۔ کراچی و پنجاب نا حاجیک دال سوزی ءِ زیات پسند کیرہ، ہنداوڑ بلوچستان و کے پی کے نا مخلوق آک پارہ کہ دال و سوزی بایدے ہی مفروسس۔ دا معاملہ نا ہم سجفنگ آن پد گچین ءُ ایسر اس پیش تمک۔