اسلام آباد۔ 25نومبر (اے پی پی) وزیراعظم عمران خان پارینے کہ چاگڑدی کچٹی انسانی زند اکن بے کچ خطرناک ءِ، پاکستانءِ ساف و سرسوز جوڑ کرسا مثالی ءُ ملک اس جوڑ کینہ، مچ آ قوم ءِ اواری اٹ چاگڑدی کچٹی نا مقابلہ ءِ کروئی مریک، پاکستان نا اگہ نن قدر ءِ کین تو دا خیسن دسک، و بھلو سیل و سواتی جاگہ اس مرسا مون آ بریک، پنجاب و خیبر پختونخوا ٹی پوسکن ءُ تاریخی بلدیاتی نظام اس اتنگ اُن، خلقت تینا آخبت نا فیصلہ ءِ تینٹ کیرہ، خراج نیٹ اٹی ودکی مننگ ءِ، خراج نا پیسہ غاک ملک ءِ سہی کننگ و چاگڑد ءِ گچین کننگ آ خڑچ کینہ۔ داخیال آتا درشانی ءِ او دوشنبے نادے آ ملک اٹی کلین اینڈ گرین پاکستان انڈیکس نا بنائی دود آن تران کرسا کرے۔ وزیراعظم پارے کہ اللہ نا پرمان آ چلینگپروک آ قومک برباد مریرہ۔ نن دنیا ٹی بایدے ہندن ءُ کاریم کین ہرافتا زہم آک سد و ہزار آ سال اسکان سلر۔ ہراوخت اسکان قوم اس بروک آ چین تیکن سجفپک تو اوڑکن بربادی ہی مریک۔ اوپارے کہ 35سال مست لاہور ساف ستھرا شار اس ئس، اینو ہموڑے ساہ ہلنگ ہم محال ءِ۔ کچٹی اسہ چُپ ءُ قاتل اسے و لاہور دنیا ٹی ارٹ میکو یا مسٹ میکو کچٹ انگا شار جوڑ مسنے۔ چاگڑدی کچٹی انسانی زند اکن بے کچ خطر ناک ءِ۔ افسوزناک ءِ کہ لاہور چاگڑدی کچٹی آن بھاز زہمیءِ۔ لاہور اٹی 70 درسد درخت آتے کاٹ کننگا۔ داسہ وخت بسنے کہ غٹ اواری اٹ پاکستان ءِ سرسوز کین۔ لاہور اٹی مستین اٹی ساف ستھرا شار اس ئس اینو دریائے راوی ہم سیوریج نا ڈھیر اس جوڑ مسنے۔ سیوریج نا دیر تے دریا تیٹی خسنگک و ہندا کچٹ انگا دیرتے مخلوق آک کنیرہ و فصل آتے ایترہ۔ وزیراعظم پارے کہ حکومت تنیا دا کاریم ءِ کننگ کپک۔ انتظامیہ و گچین مروک آ نمائندہ غاتے ساف و سرسوز جوڑ کننگ اٹ تینا کڑد ءِ ادا کروئی مریک۔ پاکستان اللہ تعالیٰ نا ٹیکی اسے ہرانا نن قدر ءِ کپننگ اُن اگہ قدر ءِ تہ کین تو ہندا پاکستان خیسن اس مریک۔ داخہ در زیبائی دنیا ناپین ملک اسے ٹی اف۔ داڑے ہروڑنا موسم و قدرتی وسیلہ غاتیان مالامال ءِ۔ پاکستان دنیا ٹی معدنیات آن مالامال 10 بھلا ملک آتے ٹی اوار ءِ۔ مچ آ قوم ءِ اواری اٹ چاگڑد نا کچٹی نا مقابلہ ءِ کروئی مریک۔ پاکستان زیبائی نا سوب آن بھلو سیل و سواتی و اہم ءُ ملک اس مرسا مون آ بریک۔ طالب علم آک پاکستان نا آخبت ءُ، اوفک ساف و سرسوز مہم اٹ بایدے پبی بشخ ہلیر۔ وزیراعظم پارے کہ پنجاب و خیبر پختونخوا ٹی اولیکو وار ہندن ءُ تاریخی بلدیاتی نظام اس اتنگ اُن ہراٹی خلقت تینا آخبت نا فیصلہ ءِ تینٹ کیرہ۔ پوسکن آ بلدیاتی نظام نا رداٹ خلق نا بندغ آک ہم داٹی پبی بشخ ہلیرہ۔ اوپارے کہ سندھ اٹی ننا حکومت اف ولے سندھ ءِ شون ہلوئی ءِ تو ہندا بلدیاتی نظام ءِ تینا کروئی مریک۔ داڑان بیدس او شون ہلنگ کپک۔ وزیراعظم پارے کہ پوسکن آ پاکستان نا نظریہ ءِ پہہ مننگ نا گرج ءِ۔ پوسکن آ پاکستان کن اول ذہن آتے ٹی بدلی بریک۔ کلین اینڈ گرین پاکستان مہم اٹی غٹ ورناک بشخ ہلیر و کلین اینڈ گرین چیمپین مریر۔ خواجہ ﷺ نا فرمان ءِ کہ سفائی نیمہ ایمان ءِ۔ حکومت نا داڑا پورو چکار ءِ۔ فنڈ آتے ہم کرارکرار آ ودفنہ۔ خوشی ءِ کہ خلقت خراج تننگ نا بناءِ کرینو و خرا ج نا پیسہ غاتے الس وچاگڑد آ خڑچ کننگک۔ اوپارے کہ نن خیبر پختونخوا ٹی تدوک آ 5سال اٹی 5ارب درخت خلکونن و داسہ ہراکہ جاگہ خورک مریک درخت خلنگک۔ ملک ءِ ساف و سرسوز جوڑ کینہ۔ دا عظیم مسخت کن اسکول آتا طالب علم آک کنتون پبی تفر۔ اوپارے کہ شوکت خانم ہسپتا ل نا جوڑ کننگ کن ہم طالب علم آک کنتون بھاز کمک کریسر۔ اوفتا کمک آن بیدس دا ہسپتال نا تفنگ ممکن الوکہ۔
