اسلام آباد۔ 25نومبر (اے پی پی) وزیراعظم نا سلاہکار ماحولیات ملک امین اسلم پارینے کہ اسلام آباد اٹی کلین اینڈ گرین مہم سرسہبی اٹ برجاءِ، الیکٹرک گاڈی تا کمک اٹ چاگڑدی کچٹی نا مون ءِ توننگ مریک، ملک اٹی ہزار آ گیلن دیرسمندراٹی زیان مریک، دیر انا زیان ءِ توننگ کن گام گیج کننگ انگ ءِ، اسہ مافیا اس خواپک کہ ملک اٹی الیکٹرک گاڈیک بریر و سرسہب مریر۔ داخیال آتا درشانی ءِ او ملک اٹی کلین اینڈ گرین پاکستان انڈیکس نا بنائی دود آن تران کرسا کرے۔ سلاہکار ماحولیات پارے کہ اسلام آباد اٹی کلین اینڈ گرین مہم سرسہبی اٹ برجاءِ، ملک اٹی الیکٹرک گاڈی تا کمک اٹ چاگڑدی کچٹی نا مون ءِ توننگ مریک۔ اوپارے کہ ملک اٹی ہزار آ گیلن دیر سمندر اٹی زیان مریک، دیر انا زیان ءِ توننگ کن گام گیج کننگ انگ ءِ، اسہ مافیا اس خواپک کہ الیکٹرک گاڈیک بریر و سرسہب مریر۔ اوپارے کہ ٹمبر و لینڈ مافیا تون اوار غٹ مافیا تا مون ءِ توننگ اٹ وزیراعظم نا اہم ءُ کڑد اسے، پاکستان اٹی جان جوڑی کن خراب انگا دیر ءِ دُوارہ ساف کرسا کاریم اٹ اتنگ نا قابل جوڑ کننگک، ملک انا 19شار تیٹی چندی انڈیکیٹرز آتیا کاریم برجاءِ۔ اوپارے کہ چین غٹ گڑاتے تون تینا ملکی زرگزران نا سمت ءِ بدل کرینے، غٹ ڈٹ آتا سرسہبی کن السی آگاہی نا گرج ءِ، کلین اینڈ گرین مہم اٹی طالب علم آتا ہم ءُ کڑد اسے۔ اوپارے کہ اسلام آباد اٹی اسکول آتا 10 ہزار طالب علم رجسٹرڈ مسنو و داکچ ءِ نن 30 ہزار اسکان دینہ، یونیورسٹی نا طالب علم آتے ہم داٹی اوار کننگک۔ اوپارے کہ کلین اینڈ گرین پاکستان انڈیکس نا رداٹ جوان انگا شار تے ایوارڈ تننگک، درجہ بندی یونین کونسل نا کہول اسکان مریک، حساب وکتاب جمع کننگ نا عمل شفاف مریک۔ اوپارے کہ وزیراعظم پورٹل آ 35درسد غاو سفائی نا ہیبدار حالیت و ماحولیات نا ویل آتا بابت ءُ۔ اوپارے کہ ننا ملک اٹی ہر جاگہ غا مافیا ک تولوک ءُ ہرا تینے کانود آن ایڑتر سمجھرہ ولے ننے ہندن ءُ وزیراعظم اس ملانے ہرا نئے سودا مریک و نئے تینے شیف تورک۔ وزیراعظم نا سرسہب ورناپروگرام نا رداٹ ہم ماحولیات نا ڈٹ آتے اوار کننگک۔
