اسلام آباد۔ 25نومبر (اے پی پی) امیر البحر ایڈمرل ظفر محمود عباسی سرکاری دورہ غا سعودی عرب آ سرمس، اول سعودی انٹرنیشنل میری ٹائم فورم اٹی بشخ ہلک، نیول چیف ءِ خصوصی وڑاٹ فورم نا ارٹ میکو سیشن نا مہمان اعزازی کننگا۔ امیر البحر فورم آن تران ہم کرے۔ ترجمان پاک بحریہ نا رداٹ مسہ دے ئی انٹرنیشنل فورم اٹی13ملک آتا بحری سرکڑدہ بشخ ہلنگ ءُ۔ فورم اٹی علاقائی سمندری رکھ، سمندری چاگڑد اٹی بدلی نا اثر، میری ٹائم انڈسٹری ءِ مون تروک چیلنج و اوفتا توننگ کن گام گیج آتیا گپ و تران مس۔ دورہ ٹی امیر البحر نا کمانڈر رائل سعودی نیول فورس آتون خصوصی و ایلو ملک آتا ہم منصب آتون ہم اوڑدہی کرے ہراٹی تین پہ تینی است خواہی نا معاملہ و ہڑتوم آ کنڈآتا بحری کمکاری ءِ مون آ دننگ آ گپ و تران کننگا۔ امیر البحر نیول چیف ڈیہہ ٹی سمندری رکھ و امن ءِ المی کننگ کن پاک بحریہ نا عزم ءِ تالان کرے۔ ترجمان پاک بحریہ نا رداٹ نیول چیف نا دا دورہ ہڑتوم آ ملک خاص کر بحری فوج انا نیام اٹ تعلقداری تے پین مون آ دیک۔
