اسلام آباد۔ 25نومبر (اے پی پی) اسلام آباد ہائی کورٹ توہین عدالت کیس اٹی وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان و بنجائی وزیر غلام سرور خان نا معافی ءِ قبول کرے۔ عدالت عالیہ ہڑتوم آ وزیر آتا برخلاف جاری شوکاز نوٹس ءِ پدی ہلک۔ اسلام آباد ہائی کورٹ اٹی ڈاکٹر فردوس عاشق اعوان و غلام سرور خان نا برخلاف توہین عدالت کیس انا سماعت چیف جسٹس اطہرمن اللہ کرے۔ چیف جسٹس ریمارکس تس کہ نم ہڑتوم آک بھاز ہی زموار اورے، نم ریاست نا غٹ آن بڑزکو نمائندہ اورے، نم ہراتم تینا لوز آتا کمک اٹ غلط تشریح کیرے تو ادارہ غاتیاپت سلپک۔ غلام سرور خان ءِ داد ایتیوہ، اوپارے کہ بیان سیاسی ئس، نن دا پاپنہ ننے ٹی خامی اف، ہر جاگہ غا خامی ارے، سیاسی بیان بازی نا سوب آن خلقت نا پت ءِ خراب کننگ جوانءُ ہیت اس اف۔ چیف جسٹس اطہر من اللہ پارے کہ سیاستدان خلقت نا پت سسٹم آ پین ودفر، سیاسی مخالفت نا سوب آن پت ءِ ٹھیس تفننگپ، تنقید آن نن خلیپنہ، ننکن پین ہم چیلنج ساڑی ارے۔ عدالت است جم ءِ کہ نی انتس کہ پاریس او توہین عدالت اٹ ضرور بریک۔ عدالت نا شوکاز نوٹس ءِ پدی ہلیک۔ چیف جسٹس ریمارکس تس کہ سیاست کن ادارہ غاتے متنازعہ کننگ سہی اف، اومیت کیوہ کہ نم الس آ ادارہ غاتا پت ءِ ودفیرے، عدالت آک تنقید آن خلیپسہ بلکن بخیر اٹ پارہ۔ ہڑتوم آ سائیڈآک ہنداوڑ کیرہ فیصلہ برخلاف برے تو ہندن ءُ بیان ایترہ، اومیتءِ بروک آ زیر سماعت مقدمہ غاتیا ہچ ءُ رائے اس تننگپک۔ لس سوالیک اصل سٹیک ہولڈر ءُ، ہرا حکومت و پارلیمان نا کنڈا ہُننگ ءُ۔ وکیل شاہ خاور پارے کہ توہین عدالت نا شوکاز نوٹس ءِ پدی ہلنگ آ عدالت نا منت واراُن اوکان پد عدالت توہین عدالت کیس اٹی فردوس عاشق اعوان ءِ جاری کروک شوکاز نوٹس ءِ پدی ہلسا ہڑتوم آ وزیرآتا معافی ءِ قبول کرے۔
