بنجائی وزیر بجلی و پٹرولیم عمر ایوب نا ڈنمارک نا سفیر تون گپ و تران

اسلام آباد ۔ 22نومبر (اے پی پی) بنجائی وزیر بجلی و پٹرولیم عمر ایوب پارینے کہ پاکستان صوبہ غاتا امنائی اٹ پوسکن آ قابل تجدید توانائی پالیسی نا منظوری ءِ تسنے ، جہانی کہول آ کلین گرین انرجی ءِ مون آ دننگ اٹ ڈنمارک نا اہم ءُ کڑد اسے، 2025ء اسکان قابل تجدید ذریعہ اٹ بجلی پیدوار ءِ ساڑی آ 4 درسد آن ودفسا 20 درسد آ اتینہ ۔ داہیت ءِ او ڈنمارک نا سفیر روڈلف ہالموب تون گپ و تران کرسا پارے ہرا جمعہ نادے آ داڑے بنجائی وزیر تون اوڑدہی کرے ۔ داوخت آ سیکرٹری پاور ڈویژن عرفان علی ہم ساڑی ئس ۔ عمر ایوب پارے کہ پاکستان ہم ملک اٹی قابل تجدید توانائی نا وارخواہی تیان فائدہ ہرفک، پوسکن آ قابل تجدید توانائی پالیسی زوت حتمی منظوری کن مشترکہ مفادات کونسل ءِ پیش کننگک ۔ اوپارے کہ 2030 ء اسکان بجلی ٹی قابل تجدید توانائی نا بشخ 30 درسد اسکان ودفنگک، 2030 ء اسکان متبادل اڑزان ذریعہ اٹ 20 ہزار میگاواٹ بجلی ودی کننگ نا ہدف ءِ، اڑزان خڑچ آ لگوک آ ڈٹ آتیان بجلی مرحلہ وار اڑزان مریک، ملک اٹی قابل تجدید توانائی ڈٹ آتیان روزگارنا بھلو وارخواہی اس ودی مریک ۔ اوپارے کہ پوسکن آ قابل تجدید پالیسی نا رداٹ بجلی نا ڈٹ آک شفاف وڑاٹ مسابقتی بولی آلگرہ ۔ بنجائی وزیر ڈنمارک نا کمپنی تے پاکستان اٹی سولر پینلز و ونڈٹربائنز نا تیاری ٹی زرکاری نا سلہ خلک ۔ ڈنمارک سفیر متبادل توانائیءِ مون آ دننگ کن حکومتی عزم انا ستاءِ کرے ۔ ڈنمارک نا سفیر پارے کہ ڈنمارک قابل تجدید توانائی ءِ مون آ دننگ کن پاکستان چاہندار آتا کمک ءِ کننگ کن تیار ءِ ۔ اوپارے کہ ڈنمارک نا کمپنیک پاکستان اٹی متبادل توانائی ڈٹ خلنگ کن مسابقی بولی ٹی بشخ ہلنگ کن تیار ءُ ۔