سی پیک پاکستان و چین نا اولیت ءِ، چین نا سفیر یاءوجنگ نا پاک چائنا انسٹیٹیوٹ نا 5می میڈیا فورم آن تران

اسلام آباد ۔ 22نومبر (اے پی پی)پاکستان اٹی چین نا سفیر یاءوجنگ پارینے کہ سی پیک پاکستان و چین نا اولیت ءِ ۔ حقیقت آ مبنی معلومداری آن منفی پروپیگنڈا نا ازالہ ءِ کروئی ءِ، سی پیک نا بروک آ مرحلہ صنعتی کمکاری ءِ مون آ دیک ۔ داخیال آتا درشانی ءِ او جمعہ نادے آ پاک چائنا انسٹیٹیوٹ نا 5می میڈیا فورم آن تران کرسا کرے ۔ اوپارے کہ سی پیک نا ارٹ میکو مرحلہ ٹی صنعتی زون تاجوڑ کننگ، تعلیم و کشت وکشار تون اوار ایلو بشخ آتیا خصوصی چکار کننگ انگ ءِ ۔ چینی سفیر پارے کہ اولیکو مرحلہ ٹی بنداوی پنجر نا شونداری و توانائی تون اوار شاہراہ تا جوڑ کننگ نا چکار کننگا ۔ چینی سفیر پارے کہ ہڑتوم آ ملک آتا کمکاری آن دا ڈٹ سرسہبی نا کسر آ روان ءِ ۔ اوپارے کہ سی پیک نا رداٹ چینی و پاکستانی حکومت دا فیصلہ کرینو کہ ہڑتوم آ ملک آک خاص وڑاٹ اقتصادی کمکاری ءِ مون آ دیرہ ۔ اوپارے کہ سی پیک آ پیش رفت نا بارواٹی ہڑتوم آ ملک آتے ٹی پورو امنائی ءِ ۔ سی پیک نا مسخت پاکستان نا پیدواری لاءخی تیٹی ودکی کننگ ءِ ۔ سی پیک نا بروک آ مرحلہ صنعتی کمکاری ءِ مون آ دیک ۔ اوپارے کہ ایمبیسڈ رایلس ویلز نا بجلی ٹیرف نا زیات مننگ نا بیان ءِ بنگٹ حیرت مس، سی پیک نا بارواٹی وڈی خوری نا ہیت ءِ کننگ آسان ءِ ہراتم نم تون درست معلومداری مف، سی پیک نا ڈٹ آتا بابت نیب اتون اوار غٹ چیک کرینو، ہچءُ وڈی خوری اس مون آ بتنے ۔ اوپارے کہ غٹ ڈٹ آتے ٹی پورو شفافیت خننگا ۔ ایلس ویلز ایم ایل ون آ ہم ہیت کرے ۔ ایم ایل ون ریلوے ڈٹ انا خڑچ 9 ارب ڈالر ءِ ، دابیرہ اسہ کساس اسے ۔ اوپارے کہ امریکی محکمہ خارجہ نا بڑزکو کمامدارآتے ایم ایل ون نا کساس آ بایدے ہیت کپروسر، دا اوفتا دفتر نا آداب نا برخلاف ءِ ۔ اوپارے کہ سی پیک پاکستان اٹی روزگارنا پوسکن ءُ وارخواہی ودی کرینے، برجا 20 ڈٹ آتے ٹی 75ہزار آن زیات پاکستانی تے روزگار فراوان کرینے ۔ بیلٹ اینڈ روڈ و سی پیک اسیجا فائدہ غاتا ڈٹ ءِ، 170 ملک آک دانا بشخ ءُ ۔ اوپارے کہ باوری کرفیوہ کہ سی پیک نا حکومت نا اولیت ءِ، میڈیا حقیقت ءِ ہرے، دانا فائدہ غاتے ہرے و منفی پروپیگنڈا تے گوجالے ۔