بنجائی وزیر ڈٹ بندی و خصوصی گام گیج اسد عمر نا ڈل اتون گپ وتران

غازی بروتھا واٹر سپلائی ڈٹ آن اسلام آباد راولپنڈی ءِ ہردے ئی 20 لکھ گیلن دیر فراوان کننگک، حلقہ نا الس تون کروک آ وعدہ غاتے پورو کیوہ

اسلام آباد ۔ 22نومبر (اے پی پی) بنجائی وزیر ڈٹ بندی و خصوصی گام گیج اسد عمر پارینے کہ غازی بروتھا واٹر سپلائی ڈٹ آن اسلام آباد راولپنڈی ءِ ہردے 20 لکھ گیلن دیر فراوان کننگک، حلقہ نا الس تون کروک آ وعدہ غاتے پورو کیوہ ۔ داخیال آتا درشانی ءِ پاکستان تحریک انصاف نا راہشون ملک امتیاز نا کماشی ٹی ڈل اتون گپ و تران کرسا کرے ۔ بنجائی وزیر پارے کہ اسلام آباد نا شاری تا دیر انا کاختی نا متکن انگا ویل ءِ ایسر کننگ انگ ءِ، غازی بروتھا واٹر سپلائی ڈٹ آن اسلام آباد و راولپنڈی ءِ ہردے ئی 20 لکھ گیلن کنوئی ءُ ساف دیر فراوان کننگک ہرافتے آن 10 لکھ گیلن اسلام آباد و 10 لکھ گیلن راولپنڈی ءِ فراوان کننگک اوپارے کہ ڈٹ آ زوت کاریم نا بناءِ کننگ انگ ءِ ہرادے چار سال اٹی پورو کننگک، ترنول اٹی 200 کٹ آتیا تالان ہسپتال اس جوڑ کننگ انگ ءِ وخت اس کہ دیہی علاقہ شاہ اللہ دتہ ٹی جوڑ بنداوی جان جوڑی ہند ءِ اپ گریڈ کننگانے و اسہ ایمبولینس اس ہم فراوان کننگانے ۔ بنجائی وزیر پارے کہ زون تھری ٹی بجلی و سوئی گیس نا ویل ءِ ایسر کننگک ۔ داوخت آ پاکستان تحریک نا راہشون ملک امتیاز بنجائی وزیر ءِ کابینہ ٹی دُوارہ پوسکن آ زمواری تیا ملنگ آ مبارکبادی تس و حلقہ ٹی الس ءِ مون تروک ویل آتیان معلومدار کرے ، ڈل اٹی خالد خان جنرل کونسلر ، رحمان خان ، غلام نبی ، گلزار خان ، شوکت اعوان ئسک ہم اوڑدہی ٹی ساڑی ئسر ۔