سد آ ہندویاتری شادانی دربار نا دود آتے ٹی بشخ ہلنگ کن (پگہ ) واہگہ نا کسر اٹ پاکستان آ سرمریرہ

اسلام آباد ۔ 22نومبر (اے پی پی) ہندو مذہب نا شیواوتاری گوروسینٹ سوامی شادارام نا 311می ودی دے و شادانی دربار حیات پتافی(تیرتھ) نا دود آتے ٹی بھارت آن پاکستان آ بروک آ ہندو یاتری تیکن بست و بند پورو، دود آتے کن سد آ نرینہ و نیاڑی ہندو یاتری پگہ ہفتہ نادے آ واہگہ بارڈر نا کسر پنداٹ پاکستان آ سرمریرہ ۔ چیئرمین متروکہ وقف املاک بورڈ ڈاکٹر عامر احمد تون اوار ایلو بڑزکو کمامدار و ہندی ہندو راہشونک یاتری تے بخیر کیرہ ۔ ترجمان متروکہ وقف املاک بورڈ انا رداٹ سیکرٹری بورڈ طارق وزیر نا پرمان آتیا ڈپٹی سیکرٹری جنرل سید فرازعباس شادانی دربار نا دود و بست و بند آتے حتمی دروشم اس تننگ کن کمشنر سکھر ، ڈپٹی کمشنر سکھر تون اوار پولیس آفیسر و ایلو انتظامی آفیسر آتون اوڑدہی کرے و سیکورٹی ءِ فول پروف کننگ کن گچین بست و بند کننگ نا بابت گپ و تران کرے ۔ ڈپٹی سیکرٹری جنرل سید فراز عباس باسک اٹاسک فورس رامیشن سنگھ اتون اوار اقلیتی وزیر ہری رام تون ہندو یاتری تا مہمان نوازی و سادھو بیلہ مندر سکھر اٹی کروک آ شونداری کاریم تا بابت آن اوڑدہی ہم کرے و بست و بند آتیان معلومدار کرے ۔ ترجمان بورڈ مستی پارے کہ بھارت آن بروک آ ہندو یاتری تا پورو خیال ءِ تخسا اوفتے فول پروف سیکورٹی تون اوار پورو آسراتی تننگک و ہندو یاتری واہگہ بارڈر نا کسر پند اٹ پاکستان آ بننگ آن پد بذریعہ بس سکھر آ رادہ مریرہ ۔ حیات پتافی دربار اٹی 25آن 27 نومبر مسہ دے ئی دود آک اڈ ہلیرہ ۔ یاتری تینا مذہبی رسم آتے پورو کننگ آن پد 5دسمبر آ واہگہ بارڈر آن پدی رادہ مریرہ ۔