اسلام آباد ۔ 21نومبر (اے پی پی) واپڈا و بجلی کمپنی تیٹی کنٹریکٹ ملازم آتے آخبتی کننگ نا گام گیج آتے زوت ایسر اسکان سرکننگک، پوسکن آبھرتی تا عمل ءِ زوت بناکننگک و بجلی کمپنی تا سلاہ ئی نجکاری نا بارواٹی ملازم آتا موقف ءِ وزیراعظم پاکستان نا مون آ پیش کینہ ۔ کارندہ غاتا خوری آن خدونا سال انا مقابلہ ٹی بجلی دُزی ءِ توننگ اٹ1;46;40 درسد کمتی مسنے و تفروک آ تیان 121 ارب روپئی آن زیات نا سلوک آ پیسہ غاتا ہلنگ اٹ سرسہبی مسنے ۔ داخیال آتا درشانیءِ بنجائی وزیر توانائی عمر ایوب خان آل پاکستان واپڈا ہائیڈرو الیکٹرک ورکرز یونین سی بی اے نا مرکزی سیکرٹری جنرل خورشید احمد نا کماشی ٹی نمائندہ ڈل اتون اوڑدہی ٹی کرے ۔ ڈل اٹی مرکزی صدر عبدالطیف نظامانی، حاجی محمد رمضان اچکزئی، گوہر تاج، جاوید اقبال بلوچ، حاجی ظاہر گل ، محمد رمضان جدون، طارق نیازی، آفتاب رفیق، ثاقب زینب، سجاد حسین ساجد و ایلوفک اوار ئسر وخت اس کہ بنجائی سیکرٹری توانائی عرفان علی و منیجنگ ڈائریکٹر پیپکو وسیم مختار ہم داوخت آ ساڑی ئس ۔ خورشید احمد بنجائی وزیر عمر ایوب خان ءِ محکمہ بجلی نا کارندہ غاتے مون تروک ویل و مشکلات آتیان معلومدار کرسا خواست کرے کہ بجلی صارف آتا ودوک آ کچ انا بنا آ بجلی کمپنی تیٹی دمدستی وڑاٹ پوسکن آ بھرتی تا بناءِ کننگے ۔ کنٹریکٹ و ڈیلی ویجز ملازم آتے زوت ریگولرکننگے و گدوتھرمل پاور ہاءوس و اسلام آباد و لاہور نا کٹیا کروک الیکٹرک سپلائی کمپنی تا نجکاری نا فیصلہ غا نظرثانی کننگے ۔ بنجائی وزیر ڈل ءِ باوری کرفے کہ محکمہ بجلی نا کارندہ غاتا ویل آتے ایسر و اوفتے کن رکھوک و جان جوڑ حالیت آتے المی کننگ کن پبی کوشست کننگک ۔
