اسلام آباد ۔ 21نومبر (اے پی پی) بنجائی وزیر ریلوے شیخ رشید احمد نا متکن آ سنگت و لال حویلی راولپنڈی نا منتظم اعلی باءو ریاض کزیت کرے ۔ باءو ریاض تدوک آ اِرا ہفتہ آن ہندی ہسپتال اٹی ئس ۔ تینا ہڑزخواہی کلہو اٹی بنجائی وزیر ریلوے شیخ رشید احمد باءو ریاض نا کزیت آ بے کچ غم و است ہسونی و متوفی نا خاہوت تون ہمدردی نا درشانی ءِ کرے ۔ شیخ رشید احمد پارے کہ ای اینو تینا بے کچ قابل اعتبار سنگت نا 40 سالہ رفاقت آن محروم مسٹ ۔ اونا کمتی ءِ ہچ کس پورو کننگ کپک، باءو ریاض اسہ بے کچ نرم خو ایماندار و ملنسار شخصیت نا مالک ئس و لال حویلی نا منتظم اعلی نا فرض ءِ سرانجام تسکہ ۔ اوپارے کہ باءو ریاض شیخ رشید احمد نا سیاسی زند اٹی اسہ بے کچ پت انا قابل سنگت و تدوک آ چِل سال آن شیخ رشید احمد و لال حویلی تون وابستہ ئس ۔ شیخ رشید احمد پارے کہ باءو ریاض نا مرک آن ودی مروک آ خلا وخت اس ہم پُر مننگ کپک ۔ باءو ریاض تینا خاہوت اٹی اسہ جنوزان و ہشت چناءِ ہلانے ۔
