اسلام آباد ۔ 20نومبر (اے پی پی) صدر مملکت ڈاکٹر عارف علوی ترکی سلہہ بند فوج انا چیف آف جنرل اسٹاف جنرل یاسر گلیر ءِ نشان امتیاز ملٹری اس تس ۔ چارشنبے نادے آ ایوان صدر اٹی اڈ ہلوک آ خصوصی دود اٹی ترکی نا چیف آف جنرل اسٹاف ءِ دا اعزاز ءِ تننگا ۔ اوکان پد جنرل یاسر گلیر ڈل اتون اوار صدر مملکت تون اوڑدہی کرے ۔ داوخت آ صدر مملکت اودے مبارکبادی ترسا پارے کہ پاکستان و ترکی نا نیام اٹ مذہبی و دودوبیدہ میرات آ محیط و بے مثال تعلقداری ءِ ہرا داسہ کیہی سال آتیان سوگو تزویراتی شریداری ٹی بدل مسنو و سوگو تر مسنو ۔ او پارے کہ پاکستان ترکی و ملائیشیا نا شریداری اٹ انگریزی ٹی وی چینل نا گام گیج جہانی کہول آ اسلاموفوبیا نا چٹفنگ کن اسہ مزل نا نشان اس مریک ۔ صدر مملکت پارے کہ پاکستان و ترکی مشکل وخت اٹی اسہ ایلو تون تفینو ، تنازعہ کشمیر خاص کر اقوام متحدہ ٹی ترکی نا کنڈآن کمکاری سفت نا قابل ءِ ۔ مقبوضہ جموں کشمیر اٹی بھارتی سلہہ بند فوج انا ظلم و جور آ پاکستان نا گڑتی نا اعادہ ءِ کرسا صدر مملکت پارے کہ بھارت نا حکومت آن 5 اگست 2019ء آ آرٹیکل 370 و 35اے انا چٹفنگ آن پد نا حالیت آتیا ننے بھاز گڑتی ءِ ۔ اوداوخت آ مقبوضہ کشمیر اٹی بھارتی سرجز و انسانی حق انا سنگین خلاف ورزی تے مون آ تخسا جہانی برادری آن خواست کرے کہ او اقوام متحدہ نا قرارداد آتا رداٹ تنازعہ کشمیر نا ایسری کن مثبت کڑد ادا کے ۔ صدر مملکت پارے کہ پاکستان و ترکی اسہ ایلو تون ہر فورم آ کمکاری ءِ برجاتخرہ ۔ اوپاکستان و ترکی نا نیام اٹ دفاعی کمکاری ءِ مون آ تخسا پارے کہ بڑزکو کہول آ ڈل آتا ہن و بر آن داٹی ودکی مریک ۔ صدر مملکت زور شاغا کہ او دفاعی بشخ اٹی ہڑتوم آ ملک آتا نیام اٹ کمکاری ءِ پین سوگو کننگ کن پوسکن ءُ کسر پٹنگ خواہک ۔
