اسلام آباد ۔ 20 نومبر (اے پی پی) صدر مملکت عارف علوی پارینے کہ پاکستان کیہی تہذیب آتا گہوارہ مسنے و حکومت سیل و سوات خاص کر مذہبی سیل و سوات ءِ مون آ دننگ کن پرعزم ءِ ۔ دا ہیت ءِ اوبدھ جوگی سلسلے نا پنی آ راہشون وان ہینگ نا کماشی ٹی سویلی کورین ڈل اتون گپ و تران کرسا پارے ہرافک چارشنبے نادے آ داڑے ایوان صدر اٹی اوڑتون اوڑدہی کریر ۔ صدر مملکت پارے کہ پاکستان اٹی بدھ مت نا کیہی تاریخی ہند آتا ساڑی گری نا سوب آن حکومت مذہبی سیل و سوات ءِ مون آ دننگ آ خصوصی چکار کننگ ءِ ۔ صدر مملکت پارے کہ سویلی کورین بدھ ھسٹ ڈل غٹ مذہب آتا نیام اٹ امن ، ہم آہنگی و افہام و تفہیم نا اسیجا کلہو ایتک ۔ صدر مملکت پارے کہ دورہ آن الس نا نیام اٹ رابطہ و ہڑتوم آ ملک آتا نیام اٹ مذہبی و دودوربیدہ رابطہ غاتے مون آ دننگ اٹ ہم کمک رسینگک ۔ ڈاکٹر عارف علوی پارے کہ پاکستان سویلی کوریا نا نیام اٹ دودوربیدہ مذہبی رابطہ گندھار اتہذیب نا دور آن برسا کننگ ءِ ۔ صدر مملکت پارے کہ پاکستان ءِ تینا بدھسٹ میرات آ گمر ءِ، ہراد ے انسانیت نا اسیجا میرات نا وڑاٹ رکھ کننگانے ۔ اوپارے کہ ہڑتوم آ ملک آتے بدھ مت نا تاریخی ہند آتا رکھ اکن پین کمکاری نا گرج ءِ ۔
