اسلام آباد ۔ 20نومبر (اے پی پی) وزیراعظم عمران خان نا کماشی ٹی حکومت نا معاشی ٹیم انا چارشنبے نادے آ دیوان اس مس ۔ دیوان اٹی بنجائی وزیر اقتصادی امور حماد اظہر، بنجائی وزیر بحری امور سید علی حیدر زیدی ، وزیر ڈٹ بندی اسد عمر، بنجائی وزیر توانائی عمر ایوب خان، سلاہکار واپار عبدالرزاق داءود ، سلاہکار خزانہ عبدالحفیظ شیخ ، سلاہکار ڈاکٹر عشرت حسین، وزیراعظم نا خصوصی کمکار ڈاکٹر فردوس عاشق اعوان ، خصوصی کمکار ڈاکٹر ثانیہ نشتر ، خصوصی کمکار ندیم بابر، چیئرمین زرکاری بورڈ سید زبیر گیلانی ، گورنر اسٹیٹ بینک رضاباقر، مسکوہی وزیر خزانہ شوکت ترین، تعلقدار وزارت آتا سیکرٹری صاحب آک و سینئر آفیسر آک ساڑی ئسر ۔ دیوان اٹی پیشن نا ملک رہینگوک آ پاکستانی تا کنڈآن مون تروک آ ترسیلات زر اٹی ودکی و اوفتے مراعات تننگ، پاکستان اسٹیل ملز انا بحالی ، پاکستان بناءو سرٹیفکیٹس نا تشہیر ، جہانی ادارہ غاتا کمک اٹ برجا شونداری ڈٹ آتا پیش رفت نا جاچ، نسخان ہرفوک آ ناجوڑ سرکاری ادارہ (سک یونٹس) نا بحالی کن گام گیج کون آ اہم معاملہ غاتیا سجفنگا ۔ وزیراعظم ءِ پاننگاکہ ترسیلات زر اٹی تدوک آ مسہ سال اٹی شرح نمو صفر مسنے ۔ ولے مسہ سال آن پد ترسیلات زر اٹی 09 درسد ودکی خننگانے ہراکہ مالی سال 2019ء ٹی 21;46;8 ارب ڈالر ءِ ۔ دیوان ءِ پاننگاکہ برطانیہ ، ملائیشیا ، کینیڈا و آسٹریلیا غان ترسیلات زر اٹی ودکی خننگانے ۔ برطانیہ آن ترسیلات زر اٹی 09 درسد ودکی مسنے ۔ دیوان ءِ پاننگاکہ ترسیلات زر اٹی پین ودکی گمانی ءِ ۔ وزارت خزانہ و اسٹیٹ بینک انا کنڈآن ترسیلات زر انا بابت مراعات تننگ آ چندی سلاہ وزیراعظم ءِ پیش کننگا ۔ داسلاہ تیٹی ترسیلات زر انا بابت بینک آتے 15درسد شرح نمو دوئی کننگ آ اسہ ڈالر تون اسہ روپئی فراوان کننگ نا پالیسی ءِ برجاتخنگ، ٹیلی گرافک ٹرانزیکشن کن درکار کم آن کم زر ءِ پین شیف اتنگ، پیشن نا ملک ہنوک آ پاکستانی تا بینک اکاءونٹ ملفنگ اٹ کمک فراوان کننگ، پیشن نا ملک آن سرمروک آ ترسیلات آتے سرکننگ کن پاکستان پوسٹ آفس نا خذمت آتے کاریم اٹ اتنگ کون آ چندی سلاہ آک اوار ئسر ۔
