اسلام آباد ۔ 20 نومبر (اے پی پی) وزیراعظم عمران خان پارینے کہ حکومتی گام گیج آتا سوب درملکی زرکاری ٹی ودکی مسنے، پالیسی تیٹی تسلسل اٹ زرکار آتا پت بحال مریک، پاکستان اٹی ڈیہہ ٹی غٹ آن زیات شونداری نا لاءخی ارے ، کرپشن ملک ءِ بھاز زیات نسخان تسنے ۔ داخیال آتا درشانی ءِ چارشنبے نادے آ داڑے برآمد کنندگان اٹی سیلز خراج و انکم خراج نا ریفنڈز نا دود آن تران کرسا کرے ۔ اوپارے کہ وزیراعظم نا منصب ءِ سنبھالاٹ تو غٹ آن بھلا ویل 19 ارب ڈالر نا کرنٹ اکاءونٹ نسخان ئس، درملکی زرمبادلہ نا کوڑی الوکہ، خلقت ڈالرز اٹی ٹرانزیکشن کریکہ، کرنسی نا قدر کم مسکہ ۔ وزیراعظم پارے کہ ساڑی حکومت نا معاشی ٹیم انا کوشست آتا سوب روپئی نا قدر سوگو مسنے، برآمد آتے ٹی ودکی مسنے ۔ اوپارے کہ ہرادے ملک اٹی پالیسی سہی مریرہ و خلقت ءِ معلوم مریک کہ ننا پالیسیک مستقل ءُ و ملک ایڈ ہاک ازم اٹ چلینگپک تو داڑان اوفتا پت اٹی ودکی مریک ۔ عمران خان پارے کہ بھارت و بنگلہ دیش ننے آ مون آ پیش تمانو ۔ اوبھلو شونداری اس کتنو بلکن نن پدی ہنانن، ساڑی حکومت مریس وختی پالیسی تیا عمل کیک ۔ چین مریس وختی پالیسی تا کمک اٹ سرسہبی دوئی کرے ۔ چین اتون نیزگاری نا چٹفنگ نا بابت حساب وکتاب ارے ۔ وزیراعظم پارے کہ گچین کاری تیٹی سیاسی فائدہ کن میٹرو بس کون آ ڈٹ آتا بناءِ کننگک ، چین سوگوی، پیدواریت و انسانی شونداری آ چکار کننگ نا کمک اٹ سرسہبی دوئی کرے ۔ اوپارے کہ ملک نسخان اٹی مرے، ڈالر پیشن زیات کائے و ملک اٹی کم برے تو داڑان کرنٹ اکاءونٹ نسخان زیات مریک ۔ کرنٹ اکاءونٹ نسخان ودنگ آن روپئی نا قدر کم مریک ۔ پیٹرولیم مصنوعات آتا نہاد اٹی ودکی مریک، کبینی ودک ۔
