اسلام آباد ۔ 20 نومبر (اے پی پی) وزیراعظم عمران خان پارینے کہ پاکستان تہذیب آتا گہوارہ و مسہ بھلو مذہب بدتھ مت ، سکھ ازم و ہندومت نا پیروکار آتے کن مقدس ہند ءُ ۔ اوداہیت ءِ چارشنبے نادے آ داڑے بدھ مت نا راہب آتون اوڑدہی ٹی گپ و تران کرسا پارے ۔ بدھ مت نا راہب آتا ڈل انا کماشی ءِ بدھ مت نا مذہبی پیشوا و سویلی کوریا نا جوگئے آرڈر نا صدر وان ہینگ کریکہ ۔ وزیراعظم پاکستان نا عظیم تاریخی ، تہذیبی و دودوربیدہ میرات نا ذکر ءِ کرسا پارے کہ پاکستان تہذیب آتا گہوارہ و مسہ بھلو مذہب بدھ مت، سکھ ازم و ہندومت نا پیروکار آتے کن مقدس و قابل احترام ہند اسے ۔ وزیراعظم ڈل ءِ پاکستان اٹی بین المذاہب ہم آہنگی و غٹ مذہب آتے کن احترام نا حکومتی عزم انا بارواٹی معلومدار کرے ۔ وزیراعظم پارے کہ پاکستان ءِ بدھ مت نا دودوربیدگی میرات آ گمر ءِ ۔ پاکستان نا ساڑی حکومت سیل و سوات خاص کر مذہبی سیل و سوات نا مون آ دننگ آ چکار کرینے ۔ وزیراعظم پارے کہ پاکستان و سویلی کوریا بدھ مت نا تاریخی ہند آتا رکھ و مون آ دننگ کن کمکاری ٹی بایدے ودکی کے ۔ وزیراعظم عمران خان پارے کہ سویلی کوریا نا بدھ راہب آتا دورہ پاکستان آن امن و غٹ مذہب آتا نیام اٹ ہم گرنچی نا اسیجا کلہو ءِ تالان کننگ اٹ کمک رسینگک ۔ اوپارے کہ پاکستان ساڑی ہی ٹی بابا گرونانک نا 550 می ودی دے انا وخت آ کرتار پور صاحب راہداری نا بناءِ کرینے ۔ وزیراعظم اومیت ظاہر کرے کہ جوگئے آرڈر نا دورہ پاکستان آن ہڑتوم آ ملک آتا الس و گندھارا تہذیب نا دورہ آن تاریخی و تہذیبی رابطہ غاتے تالان کننگ اٹ کمک رسینگک ۔ بدھ مت نا مذہبی پیشوا و سویلی کوریا نا جوگئے آرڈر نا صدر وان ہینگ بدھ مت نا تاریخی میرات نا رکھ اکن پاکستان نا کوشست آتا ستاءِ کرے ۔ اوبین المذاہب ہم آہنگی و جہانی امن کن کوشست آتیا وزیراعظم عمران خان نا منت واری ءِ ہرفے ۔ اوسویلی کوریا ٹی پاکستان اٹی بدھ مت نا میرات نا مون آ دننگ و یاتری تے پاکستان اٹی بدھ مت نا تاریخی آثار نا یاترا کن پاکستان نا حکومت تون اواری اٹ کاریم کننگ نا است خواہی ہم ظاہر کرے ۔
