کوءٹہ ۔ 20 نومبر (اے پی پی) صوبائی وزیر داخلہ میر ضیاء لانگو پارینے کہ السی ویل آتا ایسری ٹی ہچ ءُ ڈیوالائی اسے سگپنہ ۔ آفیسر آک ایمانداری اٹ تینا فرض ءِ پورو کیر صوبائی حکومت السی خذمت آ یخین تخک وڈی خوری نا ناسور ءِ ہچ ءُ حالیت اسے ٹی سگنگ پننگک ۔ داخیال آتا درشانی ءِ او صوبائی وزیر داخلہ ڈھاڈر اٹی ڈپٹی کمشنر نا آفس اٹی السی نمائندہ غاتون گپ و تران کرسا کرے اوکان پد سنی شوران اٹی ہم صوبائی وزیر چندی ڈل آتون اوڑدہی کرے ۔ داوخت آ ڈپٹی کمشنر ڈھاڈر ڈائریکٹر جنرل پی ڈی ایم اے ہم ساڑی ئس ۔ صوبائی وزیر داخلہ پارے کہ السی راجی آسراتی نا مشن ءِ برجاتخنہ، بلوچستان نا پسماندہ علاقہ غاتا شونداری ٹی صوبائی حکومت پبی کڑد ادا کننگ ءِ صوبہ ءِ معاشی و اقتصادی لحاظ اٹ سوگو کینہ الس تون کروک آ وعدہ غاتے پورو کینہ ۔ ننے اقتدار اسہ ہندن ءُ وخت اسے ٹی ملا ہراتم ملک ویل و مشکل آتا دلدل اٹی تموک ئس ۔ ولے وزیراعلیٰ نا ولولہ انگیز کماشی و سوگو عزم انا سوب ملک اٹی امن نا پین بحالی و ملک ءِ معاشی و اقتصادی لحاظ اٹ سوگو کننگ نا عزم کرینے صوبہ ءِ مصائب وسیلہ غاتا دلدل آن کشسا شونداری نا کسر آ روان کینہ الس ہرا ننے آ پت انا درشانی ءِ کرینے اوڑا پورو سلنہ ۔ صوبائی وزیر داخلہ مستی پارے کہ بلوچستان نا حق شونداری و شونہالی کن ہروڑ گام گیج کننگ انگ ءِ و بے روزگار ورناتے اوفتا تعلیمی قابلیت و میرٹ نا بنداو آ ملازمت ہم فراوان کننگ انگ ءِ بلوچستان نا ورناک تعلیمی قابلیت تون گچین لاءخی تا ملک ہم اریر ہنداخاطران مرکز اٹی بلوچستان ناکوٹہ غا ہندی ورناتے ملازمت آتے اوفتا روا بشخ ءِ تننگ نا سفارش ہم کننگک ۔
