کوءٹہ ۔ 20 نومبر (اے پی پی) گورنر بلوچستان امان اللہ خان یاسین زئی پارینے کہ صوبہ بلوچستان اٹی لائیو اسٹاک نا بابت زرکاری نا وارخواہی میسر ءِ ۔ المی ءِ کہ قومی و جہانی زرکار آک دا دوئی وارخواہی تیان پبی فائدہ ہرفر ، اوپارے کہ اولیکو وار مروک آ بلوچستان لائیو اسٹاک ایکسپو 2019ء اومیت آتیان زیات سرسہب مس ہرادے قومی و جہانی کہول آ بھاز است بڈی ملا دا سرسہب لائیو اسٹاک نا بابت وزیراعلیٰ بلوچستان جام کمال خان و اونا مچ آ ٹیم خراج تحسین نا حقدار ءُ ۔ داخیال آتا درشانیءِ او یونیورسٹی آف بلوچستان اٹی اڈ ہلوک آ بلوچستان لائیو اسٹاک ایکسپو 2019ء نا مسہ دے ئی دود انا بشخ ہلوک آتیان ایسری تران اس کرسا کرے ۔ داوخت آ صوبائی وزیر جان جوڑی میر نصیب اللہ مری، صوبائی سلاہکار لائیو اسٹاک مٹھاخان کاکڑ، صوبائی سلاہکار اعجاز سنجرانی ، چیف سیکرٹری فضیل اصغر، صوبائی سیکرٹری لائیو اسٹاک دوستین جمالدینی تون اوار ایلو ملک آتیان بٹنگوک آ چاہندار، پولکار واپار، زمیندار و یونیورسٹی طالب علم آتا اسہ بھلو کچ اس ساڑی ئسر ۔ بشخ ہلوک آتیان تران کرسا گورنر بلوچستان امان اللہ خان یاسین زئی پارے کہ بلوچستان اٹی ہمسایہ ملک آتیان ڈل آک ہم بشخ ہلنگ ءُ ۔ اوپارے کہ لائیو اسٹاک نا بابت لائیو اسٹاک ایکسپو نا اڈتننگ ساڑی حکومت نا بھاز جوان ءُ فیصلہ اسے و داسرسہب ایکسپو آن کشت وکشار، مالداری ، ماہی گیری و ایلو بشخ آتون وابستہ بندغ آتا ویل آتا ایسر کرفنگ اٹ کمک رسینگک ۔ گورنر یاسین زئی پارے کہ صوبہ ٹی لائیو اسٹاک ءِ مون آ دننگ آن نئے بیرہ نیزگاری چٹک بلکن خلقت ءِ روزگار نا وارخواہی ہم دوبریک ۔ ایسری دود انا بشخ ہلوک آتیان صوبائی وزیر جان جوڑی، سلاہکار لائیو اسٹاک مٹھاخان کاکڑ، اعجاز سنجرانی و چیف سیکرٹری بلوچستان فضیل اصغر ئسک ہم تران کریر ۔ ایسر اٹی گورنر بلوچستان لائیو اسٹاک ایکسپو 2019ء نا منتظمین و مہمان تیٹی یات گار شیلڈ بشخ وپانٹ کرے ۔ داکان مست اوخلوک آ اسٹال تا معائنہ ءِ کرے و جندی است خواہی ہلک ۔
