کوءٹہ ۔ 19نومبر (اے پی پی) صوبائی حکومت نا ترجمان لیاقت شاہوانی پارینے کہ صوبہ ٹی ساڑی صوبائی حکومت نا کنڈآن لائیو اسٹاک ایکسپو نا اڈتننگ اسہ انقلابی ءُ گام گیج اسے ، ہراڑان نئے بیرہ لائیو اسٹاک نا بشخ ءِ شون ملک بلکن دا صوبہ ٹی صوبہ نا لائیو اسٹاک ءِ پاکستان و جہانی منڈی تسکان رسینگ ملک ۔ داخیال آتا درشانی ءِ او کوءٹہ ٹی اڈ ہلوک آ مسہ دے ئی لائیو اسٹاک ایکسپو نا دورہ ٹی منتظمین آتون گپ و تران کرسا پارے اوپارے کہ بلوچستان نا نیم آن زیات آبادی نا ذریعہ معاش روزگار گلہ بانی ءِ و دادے پوسکن آ وڑوڈول آتیا اتسا صوبہ نا زرگزران اٹی مثبت و ترند رفتار پیش قدمی اتنگ مریک ۔ ترجمان صوبائی حکومت پارے کہ دا ایکسپو نا اڈتننگ آن پاکستان تون اوار ہمسایہ ملک و دنیا نا ایلو بشخ آتے ٹی ننا لائیو اسٹاک درستی راستی مریک و داڑکن جہانی منڈی تیٹی است بڈی ملک ۔ اوپارے کہ ساڑی حکومت و وزیراعلیٰ بلوچستان جام کمال خان نا ویژن اٹی ہم صوبائی صوبہ نا مصنوعات معدنیات میوہ و لائیو اسٹاک ءِ پوسکن آ وڑآ جہانی منڈی تسکان رسینگ ترفوئی ءِ تانکہ داڑان صوبہ نا الس نا انفرادی معاشی شونداری تون صوبہ و ملک انا زرگزران ہم شون ہلے و زرمبادلہ ٹی ودکی مننگ کے ۔ او ایکسپو نا سرسہب اڈتننگ آ وزیراعلیٰ بلوچستان جام کمال خان لائیو اسٹاک نا سلاہکار وزیراعلیٰ مٹھاخان کاکڑ چیف سیکرٹری بلوچستان فضیل اصغر و ایلو بڑزکو کمامدارآتے مبارکبادی تس و ایکسپو ٹی بشخ ہلوک آ صوبہ، ملک و ایلو ملک آتیان بروک آ مہمان تا منت واری ءِ ہرفے ۔
