حکومت بلوچستان پائیدار شونداری نا ہدف آتا دوئی کننگ کن پبی گام گیج کننگ ءِ، دا چرجوئی ٹی مچ آ صوبہ ٹی نیزگاری ٹی کمتی اتنگ تعلیم و جان جوڑی نا بنداوی آسراتی تا فراوانی و غٹ بشخ آتے ٹی گچینی اتنگ کن کوشست کننگ انگ ءِ ، صوبائی وزیر خزانہ میر ظہور احمد بلیدی
کوءٹہ ۔ 19 نومبر (اے پی پی) صوبائی وزیر خزانہ میر ظہور احمد بلیدی پارینے کہ حکومت بلوچستان پائیدار شونداری نا ہدف آتا دوئی کننگ کن پبی گام گیج کننگ ءِ، دا چرجوئی ٹی مچ آ صوبہ ٹی نیزگاری ٹی کمتی اتنگ تعلیم و جان جوڑی نا بنداوی آسراتی تا فراوانی و غٹ بشخ آتے ٹی گچینی اتنگ کن کوشست کننگ انگ ءِ ۔ داخیال آتا درشانی ءِ او ہندی ہوٹل اٹی اڈ ہلوک آ ایس ڈی جیز نا دوئی کننگ کن پارلیمنٹرین سول سوساءٹی و اکیڈمیا نا کڑد آ فورم آن تران کرسا کرے ۔ فورم ءِ یو این ڈی پی بلوچستان ڈویلپمنٹ نیٹ ورک و پی اینڈ ڈی دیپارٹمنٹ اس اڈ تسوسر ۔ فورم اٹی ایس ڈی جیز ٹاسک فورس انا کنوینر ڈپٹی اسپیکر بلوچستان اسمبلی سردار بابر خان موسیٰ خیل ، اسمبلی نا باسک مہ جبین شیران، نصیر اللہ زیرے زینت شاہوانی ، بشریٰ رند ، قادر نائل آن بیدس حکومتی شخصیت آک ، سول سوساءٹی نا راہشون اکیڈمیا کمامدار آک و ایلو چندی بشخ آتیان تعلق تخوک آ شخصیت آک بشخ ہلکر ۔ میر ظہور احمد بلیدی و سردار بابر خان موسیٰ خیل پاریر کہ حکومت ایس ڈی جیز نا غٹ مسخت آتا پوروی کن است انا ھب اٹ کاریم کننگ ءُ و نن بلوچستان نا گرج آتے پورو کننگ و خلقت نا زند انا آب اٹی گچینی اتنگ کن عملی گام گیج کننگ ءِ ۔ اوفک پاریر کہ ایس ڈی جیز نا ہدف آتا دوئی کننگ کن یو این ڈی پی نا کوشست آک ستاکڑزرہ و حکومت سول سوساءٹی تون اواری اٹ صوبہ نا شونہالی و الس نا ویل آتا ایسری کن کاریم کننگ نا است خواہ ءِ ۔ داوخت آ یو این ڈی پی بلوچستان نا سروک ذوالفقار درانی پارے کہ یو این ڈی پی پائیدار شونداری نا ہدف آتا دوئی کننگ کن حکومت بلوچستان تون اواری اٹ کاریم کیک بلکن نن حکومتی ادارہ غاتا کاریم نا کچ ءِ ودفنگ و یوتھ نا لاءخی تے نشان تننگ اٹ پبی کڑد ادا کننگ اُن ۔ بی ڈی پی نا چیئرمین امجد رشید پارے کہ یو این ڈی پی تون اواری اٹ دا فورم نا اڈتننگ نا مسخت حکومت سول سوساءٹی و اکیڈمیا ءِ پائیدار شونداری نا مسخت آتا دوئی کننگ کن متحرک کننگ ئس ۔ فورم آن ایس ڈی جیز یونٹ پی اینڈ ڈی نا چیف و بلوچستان یونیورسٹی نا پروفیسر فائزہ میر ئسک ہم تران کریر ۔ دود انا ایسر اٹی کوءٹہ آن لائن نا ضیاء خان بلوچستان یونیورسٹی نا ڈاکٹر ظہور بازئی، ایس بی نا وومن یونیورسٹی نا اسسٹنٹ پروفیسر نیلو فر جمیل و نیشنل کراٹے پلیئر مس ناز گل ءِ ایس ڈی جیز ایڈووکیٹ ایوارڈ ز تننگا ۔
