اسلام آباد ۔ 19 نومبر (اے پی پی) پاکستان تحریک انصاف نا راہشون سینیٹر فیصل جاوید پارینے کہ اصلاحات نا کمک اٹ غٹ قومی ادارہ غاتا بحالی وزیراعظم عمران خان نا حکومت نا اولیت آتے ٹی اوار ءِ ۔ ریڈیو پاکستان ءِ انٹرویو ٹی سینیٹر جاوید پارے کہ مسکوہی کرپٹ حکمران جماعت کنوئی آ گڑاتا نہاد آتے ٹی ودکی نا زموار ءُ انتئے کہ اوفتا سرکڑدہ ہی بھلو کچ اسے آ وڈی خوری کرسا ملک ءِ ناقابل تلافی نسخان تسنو و قومی ادارہ غاتیا پت کننگ نا جاگہ غا قومی وسیلہ غاتے تینا جند انا فائدہ کن کاریم اٹ ایسور ۔ سینیٹر فیصل جاوید پارے کہ ہراتم پی ٹی آئی نا حکومت اقتدار ءِ سنبھالا تو اودے نسخان اٹی چلینگوک آ قومی ادارہ غاک میراٹ اٹی ملار ۔ اوپارے کہ پی ٹی آئی نا کماشی ٹی حکومت کانود نا حکمرانی نا بالادستی آ یخین تخک و جمہوری ادارہ غاتے سوگو کننگ و شیفکو کہول آ جمہوریت ءِ مون آ دننگ کن سنجیدہ گام گیج کننگ ء ۔ اومستی پارے کہ پی ٹی آئی نا دور حکومت اٹی تدوک آ 70 سال اٹی اولیکو وار دنیا ٹی کشمیر نا ویل ءِ تالان کننگا، اومستی پارے کہ وزیراعظم عمران خان اقوام متحدہ نا جنرل اسمبلی نا فورم آ نئے بیرہ کشمیر نا ویل انا کنڈاچکار کرفے بلکن عالم اسلام نا سہی وڑاٹ ترجمانی ءِ کرے ۔
