چناتا حق انا رکھ و اوفتے گچین تعلیمی و طبی آسراتی تا فراوانی ننا بایدے اولیت مرے، اسد قیصر

اسلام آباد ۔ 19 نومبر (اے پی پی) اسپیکر قومی اسمبلی اسد قیصر پارینے کہ چناک قوم انا آخبت و پاکستان نا وارث ءُ، چناک ہی ملک و قوم انا پن ءِ روشنا کیرہ، چناتا حق انا رکھ و اوفتے گچین تعلیمی و طبی آسراتی تا فراوانی ننا بایدے اولیت مرے ۔ اسلام چناتا حق انا رکھ آ بھاز زیات زور شاغانے، بحیثیت مسلمان چناتا حق انا رکھ ننا زمواری ءِ ، ریاست مدینہ ٹی اینو آن 1440 سال مست چناتے راجی و معاشی رکھ فراوان کننگا ۔ داخیال آتا درشانی ءِ او سے شنبے نادے آ پاکستان انسٹیٹیوٹ آف پارلیمنٹری سروسز پیپس اسلام آباد اٹی چناتا حق انا بابت اٹی اڈ ہلوک آ دود آن تران کرسا کرے ۔ اسپیکر قومی اسمبلی پارے کہ اسلام اٹی چناتا متعین کروک حق آ عمل کرسا نن چناتا حق انا بابت نن دنیا ٹی نمان ہند اس دوئی کننگ کینہ ۔ اوپارے کہ ننا ملک اٹی چناتا حق انا رکھ اکن چندی کانود ساڑی ءِ ہرافتیا سختی اٹ عملدرآمد کننگ نا گرج ءِ ۔ پاکستان اقوام متحدہ نا کمیٹی حقوق اطفال (سی آرسی ) نا سرگرم باسک ءِ ۔ سی آر سی نا کانود آ عملدرآمد کننگ ننا کانودی و اخلاقی فرض ءِ ۔ پاکستان اٹی داوخت آ چناتا حق انا بابت 29 آن زیات کانود ساڑی ارے ہرافتا جاچ ءِ ہلسا یکجا کننگ نا گرج ءِ ۔ اسد قیصر پارے کہ ساڑی آ پارلیمنٹ چناتا حق انا رکھ انا بارواٹی بھاز حساس ءِ ۔ تعلقدار بنجائی وزارت و صوبائی محکمہ غاک ساڑی آ کانود نا جاچ ءِ ہلسا پین کانود سازی کن تینا سلاہ و سوج آتے پیش کیر ۔ مقبوضہ کشمیر نا چناک تدوک آ 106دے آن گھیڑ اٹی ءُ، و اوفتے تینا اُراتیان پیش تمنگ نا موکل تننگ انگ اف ۔ اوپارے کہ کشمیری چناتے تون نئے خور و دوائی ارے و نئے او تینا اسکول آتیا ہِننگ کیرہ ۔ اقوام متحدہ نا کمیٹی حقوق اطفال کشمیری چناتے اوفتا بنداوی حق ترفنگ کن گام گیج کے ۔ بھارتی فوج انا مسکوہی میجر جنرل ایس پی سینا نا بیان نا ترندی اٹ مذمت ءِ کرسا اوپارے کہ ایس پی سینا نا بیان بے کچ شرمناک و دیوالیہ پن نا انتہاءِ ۔ اسہ ہم مذہب اس ، راج اس بھارتی سرکار نا دا دیوالیہ ءِ سگنگ کپک ۔ اسپیکر دود انا سرسہب اڈتننگ آ نیشنل پارلیمانی ٹاسک فورس انا کنوینر ریاض فتیانہ و ایس ڈی جیز نا خصوصی پڑک چائلڈ راءٹس نا چیئرپرسن گودی مہناز اکبر ءِ مبارکبادی تس ۔