اسلام آباد ۔ 19 نومبر (اے پی پی) بنجائی وزیر سائنس اینڈ ٹیکنالوجی چوہدری فواد حسین پارینے کہ (ن) لیگ داسہ تینا منشور نا پن ءِ چمڑی جائے پر دمڑی نہ جائے تخے، نواز شریف کون ءُ آسراتی جیل تیٹی بند ایلو بندی تے ہم بایدے ملے، ویڈیو آن لگاکہ کہ اوجوڑ ءِ ، ملک اٹی لس و خاص بندغ آتے کن اسہ وڑنا بایدے قانود مرے، ہرنہ کہ نواز شریف پدی بریک یا آخا، نن دعا کننگ اُن کہ میاں نواز شریف جان جوڑ مرے ۔ داخیال آتا درشانیءِ او سے شنبے نادے آ پریس کانفرنس آن تران کرسا کرے ۔ بنجائی وزیر پارے کہ ہراوڑ ہفتہ نادے عدالت اس خلنگا و فیصلہ ءِ بنفنگا اگہ عدالت دوشنبے نا دے آ خلنگاکہ تو ہچ ءُ سرکڑدہ اس بتوکہ ۔ داوڑ نا فیصلہ غاتیان راج اٹی پرخ ودی مریک ہرا دا ثابت کیک کہ طاقت ورکن جتا و لس بندغ کن جتا ءُ کانود اسے ۔ اوپارے کہ داسہ ہروئی ءِ کہ میاں نواز شریف تینا درمان ءِ کرفنگ آن پد پدی بریک یا آخا ۔ اوپارے کہ اینو سے شنبے آ مروک آ بنجائی کابینہ نا دیوان اٹی میاں نواز شریف نا فیصلہ غا سپریم کورٹ اٹی اپیل کننگ نا بابت سجفنگک ۔ اوپارے کہ نواز شریف آ جرمانہ حکومت آخا بلکن عدالت خلکونے و (ن) لیگ تینا منشور نا پن ءِ چمڑی جائے پر دمڑی نہ جائے تخے و نن پیدوار کننگ خوانہ کہ ہچ ءُ حالیت اسے ٹی این آر او مفک ۔ اوپارے کہ نواز شریف نا لندن آ رادہ مننگ نا ویڈیو آن لگاکہ کہ اونا طب جوان ءِ و ای دعا کننگ اُٹ کہ او زوت جان جوڑ مرے ۔
