وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان نا سینیٹ نا قائمہ کمیٹی اطلاعات و نشریات نا دیوان آن تران

اسلام آباد ۔ 18 نومبر (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ ریڈیو پاکستان ریاست نا اہم ءُ بشخ اسے، ساڑی حکومت وزیراعظم عمران خان نا کماشی ٹی ریاستی میڈیا ءِ کٹیائی کننگ کن گام گیج کننگ ءِ ۔ او دوشنبے نادے آ سینیٹ نا قائمہ کمیٹی حوالکاری و شین کاری نا دیوان آن تران کریکہ ۔ دیوان نا کماشی ءِ چیئرمین کمیٹی سینیٹر فیصل جاوید کرے ۔ وزیراعظم نا خصوصی کمکار ڈاکٹر فردوس عاشق اعوان پارے کہ مسکوہی دور تیٹی ریڈیو پاکستان اٹی ہم سیاسی بنداو تیا میرٹ نا آب ءِ پش پش کننگا ۔ اوپارے کہ وزیراعظم عمران خان نا پیدوار پارت ءِ کہ پاکستان براڈ کاسٹنگ (پی بی سی) ءِ کٹیا کروک و واکدار ادارہ جوڑ کننگے ۔ اوپارے کہ کمیٹی نا باسک آک پی بی سی نا گچینی و اودے تینا نت تیا سلفنگ کن سلاہ ایتر، کمیٹی باسک آتا سلاہ و راہشونی تے مون آ تخسا حکومت گام گیج چست کیک، داوخت آ پی بی سی پورو وڑاٹ حکومتی گرانٹ آ سیبو کننگ ءِ ۔ اوپارے کہ ریڈیو پاکستان ریاست نا اہم ءُ بشخ اسے و قومی بیانیہ ءِ مون آ دننگ کن تینا مثبت کڑد ءِ ادا کننگ ءِ ۔ اوپارے کہ دابنگٹ جوان لگا کہ بھارتی مقبوضہ کشمیر ہراڑے بھارت میڈیا ءِ بند کرینے ، بھارت ریڈیو پاکستان نا ٹرانسمیشن ءِ توننگ کتنے ۔ وزیراعظم ناخصوصی کمکار ڈاکٹر فردوس عاشق اعوان پارے کہ وزیراعظم عمران خان پارت کرینے کہ پاکستان ٹیلی ویژن و پاکستان براڈ کاسٹنگ نا بورڈ آف ڈائریکٹر ز ءِ ضم کرسا اوفتا باسک آتے ٹی کسبی چاہنداری تخوک آ بندغ آتے اوار کننگے تانکہ ادارہ کسبی سمت آ چلینگ انگ کے ۔