حویلیاں ۔ 18 نومبر (اے پی پی) وزیراعظم عمران خان پارینے کہ اسلام ءِ پیسہ جوڑ کننگ کن سودا کننگ آن بھلو ہچ ءُ ڈوہ اس اف، ڈیزل و کشمیر کمیٹی نا چیئرمین شپ آ سودا مروک آ دین انا پن آ سیاست و خلقت ءِ گمراہ کننگ ءِ، ہرا اخس کہ بھلو دُز اسے او کنٹینر آ لگسا ہنداخہ زیات شور کریکہ، اینو ای تینا کرسی کن مک مکا کیو تو داغٹ آرام اٹ تولرہ ولے کنے تینا وونٹ انا آخا آخرت نا فکر ءِ، اینو کبینی و مشکل وخت مسکوہی حکمران تا سوب آن ءِ، کابینہ نا گیشتری نا سلاہ ئس کہ اودے پیشن ہِننگ کن النگپ ولے رحم بس، داڑاداک ڈرامہ کریر، قوم شہباز شریف نا ڈرامہ ءِ پہہ مسنے، پاکستان ءِ مدینہ نا ریاست نا اصول آتیا سلفسا عظیم ءُ ملک اس جوڑ کینہ، واکدار کن جتا و نزور کن جتا کانود نا تاثر بایدے چٹے، عدلیہ الس نا انصاف نا نظام آ پت ءِ بحال کیر، حکومت دا چرجوئی ٹی عدلیہ نا پبی کمک ءِ کیک، سی پیک نا ڈٹ آتیان شونہالی و روزگار نا وارخواہی دوبریک ۔ داخیال آتا درشانی ءِ او دوشنبے نادے آ ہزارہ موٹروے فیز ٹو ڈٹ انا رداٹ شاہ مقصود ۔ مانسہرہ سیکشن نا بنائی دود آن تران کرسا کرے ۔ اسپیکر قومی اسمبلی اسد قیصر، بنجائی وزیر مواصلات وپوسٹل سروسز مراد سعید و وزیراعلیٰ خیبر پختونخوا محمود خان ئسک ہم داوخت آ ساڑی ئسر ۔ وزیراعظم پارے کہ بنجائی وزیر مواصلات مراد سعید نا تقریر ءِ بنسا ای دعا کریٹہ کہ دُن ءُ جوزہ و جنون ملک انا ہر ورناٹی مرے ۔ اوپارے کہ قومک جوزہ و جنون آن ہی سلرہ ۔ اوکرکٹ نا مثال ءِ تس و پارے کہ اگہ اسہ ٹیم اسے ٹی لاءخی و ایلو ٹی جنون زیات مرے تو جنون والا ٹیم ایلو ءِ شکست تننگ کیک، گوازی مرے یا پین پڑ اس ، کٹنگ مدام جنون نا مریک ۔ اوپارے کہ مراد سعید انصاف اسٹوڈنٹس فیڈریشن (آئی ایس ایف) اٹی ئس و اینو بنجائی وزیر نا عہدہ غاٹی ءِ ، او دا عہدہ غا نئے تو رشتہ داری سے نا سوب آن بسنے و نئے اونا داوڑ نا فیملی گراءونڈ اسے ، او بیرہ میرٹ آ بسنے ، پوسٹل سروسز و وزارت مواصلات نسخان اٹی ئس، وزارت پوسٹل سروسز و مواصلات نا شونداری ٹی مراد سعید کلیدی کڑد اس ادا کرے ہراڑا ای اودے مبارکبادی ایتیوہ ۔ وزیراعظم پارے کہ اینو موٹروے نا ہراسیکشن نا بناءِ کننگ اُن دا سی پیک نا بشخ اسے، سی پیک آن ملک اٹی شونداری نا کسرآک ملنگرہ ، سی پیک اسہ روڈ اسے نا پن اف، شونداری نا اسہ پوسکن ءُ کسر اسے و لکھ آ ورناتے روزگارناوارخواہی دوبریک ۔ اوپارے کہ سی پیک آن نئے بیرہ چین بلکن پاکستان ءِ ہم بھاز فائدہ مریک ۔ ننا کشاری پیدوار بھاز کم ءِ، چین نا کشاری پیدوار ننے آن مسہ ، چار گنازیات ءِ ، سی پیک آن چین نا صنعت آک پاکستان آ گدریفنگرہ، داڑان ورناتے کسب ہیل کننگ نا وارخواہی دوبریک و ننا داورناک ننا طاقت مریرہ، اگہ نن تینا زرخیز ڈغار و دیر ءِ سہی کاریم اٹ اتین و ٹیکنالوجی اختیار کین تو ننا پیداوار دگنی مننگ کیک ۔ وزیراعظم پارے کہ چین اٹی ڈگھی آن پال انا پیداوار ننے آن بھاز زیات ءِ، نن ٹیکنالوجی و پوسکن آ وڑوڈول آتے کاریم اٹ اتسا تینا لائیو اسٹاک نا پیداوار ءِ گچین کننگ کینہ ۔ او پارے کہ پاکستان ءِ اللہ تعالیٰ بے شمار نعمت تسنے، اگہ نن گورننس نا نظام ءِ سہی کین و تینا الس و ورناتیا پیسہ خڑچ کین ، اوفتا تعلیم و جان جوڑی آ چکار کین تو ننا ملک بھاز شون ہلنگ کیک ۔
