کبینی ، بے روزگاری نا چٹفنگ، گڈ گورننس کن وزیراعظم گچین کاریم کننگ ءِ، شیخ رشید احمد

راولپنڈی ۔ 18 نومبر (اے پی پی) بنجائی وزیر ریلوے شیخ رشید احمد پارینے کہ کبینی، بے روزگاری نا چٹفنگ و گڈ گورننس کن وزیراعظم عمران خان گچین کاریم کننگ ءِ، مسلم لیگ ق انڈر نائینٹین اف بلکن او عمران خان تون تفوک ءُ، مولانا فضل الرحمان تون ہچ ءُ سیاسی جماعت اس اف و اگہ ارے تو مون آ اتے نشان ایتے، ہرا سیاست دانک ناجوڑ ءُ و پیشن نا ملک آ کار و درمان ءِ کرفسا پدی بریر نن اوفتا انتظار ءِ کینہ ، نواز شریف نا معاملہ غا بایدے سپریم کورٹ آ ہِننگپ، اگہ اسہ بندغ اس ناجوڑ ءِ تو اوڑا بایدے سیاست مف ۔ ایم ایل ون نا ڈٹ ہندا سال بناکیک ہراڑان راولپنڈی آن کراچی نا فاصلہ بیرہ 8 گھنٹہ نا مریک، لئی ایکسپریس وے انا 15 دے اٹی ٹینڈر ءِ جاری کننگک ہراڑا 80 بلین روپئی خڑچ بریک ۔ داخیال آتا درشانی ءِ شیخ رشید احمد دوشنبے نادے آ وقار النساء پوسٹ گریجویٹ کالج اٹی سٹوڈنٹ کونسل نا سوغندی دود آن تران کرسا کرے ۔ داوخت آ پارلیمانی سیکرٹری شیخ راشد شفیق، وقار النساء کالج نا پرنسپل پروفیسر سائرہ مفتی، ڈائریکٹر کالجز شیر احمد ستی ، راجہ بشیر احمد، استاد و طالب علم آتا بھلو کچ اس ساڑی ئسر ۔ اوپارے کہ تینا شار انا مسن تے تعلیم آن آراستہ کرینن ہراسوب آن دنیا نا ہچ ءُ واک اس راولپنڈی ءِ شکست تننگ کپک ، اللہ ہراڑان خواہک اوڑان کاریم ہلیک ۔ اوپارے کہ ہراتم راولپنڈی نا فاطمہ جناح یونیورسٹی ءِ جوڑ کریسن تو ہمووخت آ مخلوق آک پاریرہ کہ داڑے دیر خواننگ کن بریک ولے اینو پاکستان نا غٹ صوبہ غاک بشمول کشمیر گلگت بلتستان نا مسنک داڑے برسا تعلیم حاصل کننگ ءُ، میڈیکل کالج و ٹیکسلا یونیورسٹی جوڑ کرین، ساڑی ہی ٹی سیٹلاءٹ ٹاءون یونیورسٹی ءِ جوڑ کرین ہراڑے داخلہ کن 7 ہزار مسڑ درخواست تسنو ۔ اوپارے کہ راولپنڈی نا غٹ گنجان آباد علاقہ غاتے ٹی مسن تیکن اسہ اسکول اس و اسہ کالج اس جوڑ کرین و داسہ دا شار اٹی اِرا پوسکن ءُ یونیورسٹی جوڑ کننگ والا اُن ۔