وزیراعظم نا خصوصی کمکار جان جوڑی ڈاکٹر ظفر مرزا نا انٹرویو

اسلام آباد ۔ 18 نومبر (اے پی پی) پاکستان ٹائیفائیڈ آن بچفنگ نا پوسکن ءُ ویکسین اس درستی راستی کرفینے ہراڑان پاکستان دنیا ٹی چار میکو ہندن ءُ ملک اس جوڑ مسنے ہراٹی ٹائیفائیڈ نا ویکسین تننگ انگ ءِ ، دا ویکسین اٹی بھلو وخت اسسکان ٹائیفائیڈ نا برخلاف چک و تاڑ نا لاءخی ساڑی ءِ ۔ داخیال آتا درشانی ءِ وزیراعظم نا خصوصی کمکار جان جوڑی ڈاکٹر ظفر مرزا تینا اسہ انٹریو اسے ٹی کرے ۔ اوپارے کہ ٹائیفائیڈ آن بچفنگ نا ویکسین ءِ 6 تُو انا چناتے ہم تننگ مریک ۔ اولیکو مرحلہ ٹی ویکیسن ءِ سویلی سندھ اٹی کاریم اٹ اتنگک ہراڑے دا مرض انا 63درسد کیس رپورٹ مس ۔ ٹائیفائیڈ آن بچفنگ نا ویکسین ءِ ٹیکہ نا کمک اٹ چناتے تننگک و داڑکن مہم نا بناءِ کننگ انگ ءِ ہراٹی دا ویکسین اسہ کروڑ چناتے تننگک ۔ اوپارے کہ داوخت اسکان دا ویکسین رکھی ٹیکہ غاتے ٹی اوار اف ۔ پاکستان چارمیکو ملک ءِ ہراٹی ٹائیفائیڈ نا ویکسین تننگ انگ ءِ ۔ اوپارے کہ 2018 ء ٹی سندھ آن ٹائیفائیڈ نا دونیم لکھ کیس رپورٹ مسوسس ۔ ٹائیفائیڈ اٹی ودکی نا سوب ویکسین ءِ کاریم اٹ اتنگ نا فیصلہ ءِ کننگا ۔ اوپارے کہ مہم نا بناءِ سندھ آن کننگانے ۔ اوکان پد مچ آ ملک اٹی دادے بناکننگک ۔ کوشست ءِ کہ ٹائیفائیڈ نا ویکسین ءِ ہردے ئی بشخ جوڑ کننگک ۔ اوپارے کہ لس وڑاٹ ویکسین 5سال اسکان نا چناتے ٹائیفائیڈ آن بچفک ۔ جہانی ادارہ غاتا سلابت آن 5سال آن پد نا حکمت عملی اس طے کننگک ۔ جہانی وڑاٹ جان جوڑی نا بابت دا اسہ بھلو چیلنج اسے ۔