لائیو اسٹاک نا بشخ انا شونداری آن برآمد آتے ٹی ودکی، نیزگاری نا چٹفنگ و ملکی معاشی سوگوی ٹی کمک رسینگک، سیکورٹی سوگوی نا سوب پاکستان پیشن نا ملک انا زرکارآتے کن است چکو ک ءُ ہند اس جوڑ مسنے
کوءٹہ ۔ 18نومبر (اے پی پی) صدر مملکت ڈاکٹر عارف علوی لائیو اسٹاک نا بشخ انا اہمیت ءِ تالان کرسا پارینے کہ دا بشخ انا شونداری آن برآمد آتے ٹی ودکی، نیزگاری نا چٹفنگ و ملکی معاشی و سوگوی ٹی کمک رسینگک، سیکورٹی سوگوی نا سوب پاکستان پیشن نا ملک انا زرکارآتے کن است چکوک ءُ ہند اس جوڑ مسنے، ماہی گیری ءِ مون آ دننگ کن پوسکن آ مشینری و پوسکن آ ٹیکنالوجی ءِ کاریم اٹ اتنگ نا گرج ءِ ، بلوچستان اٹی ماہی گیری تون اوار لائیو اسٹاک نا ایلو بشخ آتیان فائدہ ہرفنگ نا بھلو وارخواہی اس ساڑی ءِ ۔ داخیال آتا درشانی ءِ او دوشنبے نادے آ یونیورسٹی آف بلوچستان اٹی لائیو اسٹاک نا ایکسپو آن تران کرسا کرے ۔ صدر مملکت پارے کہ دنیا ٹی اخس کہ نبی بسر اوفک ہیٹ خوافنگ نا کسب ءِ اختیار کریر، داکسب نبی تا سنت ءِ، لائیو اسٹاک نا انسان تا زند اتون بھلو تعلق اسے ، وزیراعظم عمران خان تینا تقریر اٹی پارے کہ ہر اُراٹی ککڑ تننگے ہراڑان نیزگاری ءِ چٹفنگ اٹ کمک رسینگک، خلقت اوڑا ملنڈ خلکر ہالانکہ افریقہ ٹی نیزگاری نا چٹفنگ کن ککڑ توننگ و ہیٹ سامبنگ اسہ زبردست ءُ کسب اسے ۔ اوپارے کہ پاکستان اٹی خور انا بے کچ کمتی ءِ، چناک غذائی کمتی نا گواچی ءُ، لائیو اسٹاک اہم ءُ بشخ اسے ہراڑان سُو و پال ملک ۔ اوپارے کہ پال چناتا جان جوڑی کن اہم ءِ، انسانی زند اتون لائیو اسٹاک نا بھلو تعلق اسے ، موری گالا پال انا بشخ اٹی پاکستان اٹی زرکاری کننگ ءِ، او پاکستان اٹی تینا پال انا گرج آتے پورو کننگ کیرہ و پیشن نا ملک برآمد کننگ کیرہ، دا بشخ آ خصوصی چکار کننگ نا گرج ءِ ۔ اوپارے کہ پاکستانی ڈاکٹرآک پیشن نا ملک خذمت سرانجام تننگ ءُ، ڈاکٹرز، انجینئرز، انفارمیشن ٹیکنالوجی و مصنوعی ذہانت نا چاہندار آک بایدے پیشن نا ملک آتیا کار ۔ صدر مملکت پارے کہ پاکستان اٹی زرگزران گچین مننگ ءِ ، ملک اٹی لائیو اسٹاک نا بشخ اکن بھاز گیشتر وارخواہی ارے ، داڑان ملک انا اولیت آتیا ا ثر تمک، نیزگاری ٹی کمتی بریک، خور اٹی گچینی بریک، برآمد آتا ودنگ آن زرگزران سوگو مریک ۔ دا بشخ انا شونداری آن خاہوت و خلقی علاقہ غاتا خلقت نا زند انا آب اٹی گچینی بریک، ساہدار تے جان جوڑ تخنگ کن اینٹی بائیوٹکس ءِ کاریم اٹ اتنگک، انسانی زند آ دانا اثرآک تمار ، دنیا دا معاملہ ءِ سنجیدہ ہلنگ ءِ، لائیو اسٹاک نا بابت آرگینگ گرتھ و بائیو رسٹی اہمیت تخرہ، بلوچستان اٹی بھلو وارخواہی ارے ، مستین اٹی ننا لیڈر شپ انا غلط فیصلہ غاتا سوب پاکستان پدی سلیس ۔ اوپارے کہ بے زمواری نا سوب 70 درسد مچھی تا اسٹاک ءِ چٹفیر، کمرشل کہول آ دادے زیات مون آ دننگا، مچھی تا خور اٹی 98 درسد چنا مچھی مریرہ ہراڑان اونا پیدوار آ اثر تمک، ننے ایکوافشنگ آ چکار کننگ نا گرج ءِ ۔ اوپارے کہ بلوچستان گچین ءُ لائیو اسٹاک پالیسی اس جوڑ کرینے، ویل انا پیدواری ءِ کرسا دا بابت ڈٹ بندی کرسا گچین بھرم دوئی کننگ مریک، تینا و دنیا نا آزموندہ غاتا اسیجا فائدہ غاتیان عملدرآمد اٹی آسانی مریک، بلوچستان پائیدارتوانائی ، فشریز ، معدنیات آن مالامال ءِ، بروک آ پنچ سال اٹی شونداری نا پوسکن ءُ کسر ملنگک ۔ اوپارے کہ ماہی گیری نا صنعت اٹی پوسکن آ مشینری و ٹیکنالوجی نا کاریم اٹ اتنگ نا گرج ءِ ، ننے تینا ماہی گیرتے پوسکن تربیت تننگ نا گرج ءِ ۔ اوپارے کہ دنیا پاکستان ءِ واپار نا بابت زیبا ءُ ملک اسے نا وڑاٹ ہُننگ ءِ ۔ اوپارے کہ جاپان نا دورہ ٹی کیہی زرکار آک و ادارہ غاتا سروک آتون اوڑدہی مس ۔ اوپاکستان اٹی زرکاری ٹی بھاز است خواہی ظاہر کریر ۔ چین آن 45زرکار و ڈل آتون اوڑدہی مس ۔ پاکستان زرکاری و اوفتا زرکاری ءِ مون آ دروک آ ملک جوڑ مننگ والا ءِ، پاکستان ءِ رکھوک ملک اس جوڑ کننگ آ سیکورٹی ادارہ و قوم ءِ مبارکباد ی ایتیوہ داڑان پاکستان دنیا ٹی گمر نا قابل ملک اس جوڑ مرسا مون آ بسنے ۔
