اسلام آباد ۔ 15نومبر (اے پی پی) وزیر دفاع پرویز خٹک پارینے کہ حکومت و اپوزیشن نا نیام اٹ ایوان نا چاگڑد ءِ گچین کننگ آ امنا مسنے، ننا کوشست ءِ کہ اواری اٹ پاکستان ءِ شونداری نا مزل آن ہمکنار کینہ و ایوان اٹی اسہ کنڈاسے آن ہم دُن ءُ ہچ ءُ ہیت اس مفک ہراڑان کس اسے نا است آزاری مرے ۔ جمعہ نادے آ قومی اسمبلی ٹی گپ و تران کرسا وزیر دفاع پرویز خٹک پارے کہ اپوزیشن نا منت وار اُن ۔ دروہم دیوان مس اینو ہم دیوان مریک، نن اسمبلی نا چاگڑد نا بابت اتفاق رائے اسکان سرمسن ۔ نن اواری اٹ اسمبلی نا چاگڑد ءِ گچین جوڑ کینہ ۔ آخبت اٹی اسہ کنڈاسے آن ہم اسمبلی نا چاگڑد خراب مفک ۔ اللہ آن دعا ءِ کہ اسمبلی گچین وڑاٹ چلینگے انتئے کہ دا پاکستان نا فائدہ ٹی ءِ ۔
