اسلام آباد ۔ 15نومبر (اے پی پی) پاکستان تحریک انصاف نا سینئر راہشون اسد عمر پارینے کہ حکومت نا عددی اکثریت آ بایدے ہچ کس ءِ شک و شبہ مف، نن اسپیکر و ڈپٹی اسپیکر نا عہدہ غاتے جھیڑہ ہی کننگ خواپنہ، ننا نظریہ و دلیل سوگو ءِ، اپوزیشن ءِ دانا ہم بایدے خیال ءِ تخے ۔ جمعہ نادے آ قومی اسمبلی ٹی گپ و تران کرسا اسد عمر پارے کہ ڈپٹی اسپیکر نا برخلاف بے پتی نا تحریک ءِ پدی ہلنگ آ اپوزیشن نا منت واریءِ ہرفنہ ۔ حکومت نا عددی اکثریت اٹی ہچ ءُ شک و شبہ اس اف، ولے اسپیکر و ڈپٹی اسپیکر نا عہدہ غاتے نن جھیڑہ ہی کننگ خواپنہ ۔ قاسم خان سوری ڈپٹی اسپیکر نا وڑاٹ تینا فرض ءِ جوان وڑاٹ انجام تسنے ۔ اوپارے کہ ننا نظریہ و دلیل سوگو ءِ ۔ اپوزیشن بایدے ننا نظریہ ءِ ہم مون آتخے ۔ کمیٹی تیٹی غٹ باسک آک بشخ ہلنگ ءِ المی کیر ۔ کمیٹی تیٹی بشخ ہلنگ آن نن اسہ ایلو آن پین ہیل کننگ کینہ ۔
