مزن وزیر عمران خان ءِ بجلی ءِ پیداوار ءِ 310میگاواٹ ءِ منصوبہ آنی من ء ُ گرانی سرءَ دستخط کنگءِ مراگشءَ گوں تران

اسلام آباد ۔ 15نومبر(اے پی پی) مزن وزیر عمران خانءَ گشتگ کہ ملک ءَ گیش مدتی منصوبہ بندی نہ بوہگءِ سوبءَ گوستءَ ایچ وڑیں دیمروئی کنگ نہ بوتگ، پن بجلی ءِ بدل ءَ گرانیں بجلی ءِ منصوبہ بندات کنگ بوہگءَ اَنت، انوگیں حکومت ءَ 14ماہ ءَ معیشت مھکم بوتگ، کلدار ءِ نیاد گہتر بوتگ، سٹاک مارکیٹ دیمروئی کنگءَ اِنت، کرنٹ اکاءونٹ ءِ نقصان ءَ کمیء ُ برآمدات ءَ گیشی بوتگ، زرکارانی اوست گیش بوہگءَ اِنت، بجلی دزّی ءِ گرء ُدارءَ چہ یک سالے ءَ 120ارب کلدار گیش وصول کنگ بوتگ اَنت، گواتءَ چہ بجلی ءِ پیداوار پہ چاگردءَ جوان بیتء ُ ارزان بیت، گوبل وارمنگ ءَ چہ پاکستان آماچ بیت، اے جیڑہ ءِ سرءَ دلگوشی کنگ لوٹ ایت ۔ اے حیالانی درشانی آئیءَ پاکستان ءَ گواتءَ چہ بجلی ءِ پیداوار ءِ310میگاواٹ ءِ منء ُ گرانی سرءَ دستخط کنگءِ مراگشءَ گوں تران کنانء َ کتگ ۔ مزن وزیر عمران خان ءَ گشتگ کہ اے وڑیں منصوبہ آنی منء ُ گرآں چہ دلی وشی بوتگ ۔ آئیءَ گشتگ کہ چین دنیاءِ تہا تینزی ءَ گوں دیمروئی کنوکیں ملک اِت ء ُ آئیءَ 30سالاں 30کروڑ مردم چہ نیزگاری ءَ درکتگ اَنت ۔ آئیءَ گشتگ کہ برصغیر ءَ درساں چہ گیش گرانیں بجلی ما جوڑ کنگءَ اَنت، وہدے کہ ارزانیں بجلی پیداک کنگ نہ بیت ء ُ صنعتی دیمروئی نہ بیت گڑا آمدنی چوں گیش بیت ۔ آئیءَ گشتگ کہ سنگاپورءِ برآمدات 300ارب ڈالر اِنت ۔ آئیءَ گشتگ کہ گوات ءَ چہ بجلی پیداک کنگءِ اے ارزانیں منصوبہ اَنت ۔ آئیءَ گشتگ کہ گلوبل وارمنگ یک مزنیں جیڑہ اِت ء ُ ایشی ء ِ آماچ بوتگیں ملک آں پاکستان 8می نمبر ءَ اِنت ۔ مے ملک ءَ آپ ءِ جیڑہ پیسرءَ چہ اَست اِنت مارا ایشی ءِ سرءَ دلگوشی کنگ لوٹ ایت ۔ آئیء َ گشتگ کہ آئی ایم ایف ء ُ میاں اوستمانی مالیاتی کارپوریشن ءِ شگرء ُ منت ءَ گراں کہ آ کمک کنگءَ اَنت ۔ مزن وزیرءَ گشتگ کہ اولی سال پہ حکومتءِ ھاترءَ باز گران بوتگ ء ُ 20ارب ڈالر ءِ کرنٹ اکاءونٹ ءِ مارا نقصان بوتگ ۔ حکومت ءِ اقتصادی ٹیم آں بازیں جہدء ُ کوشست کتگء ُ معیشتءَ را مھکم کتگ، کلدار مھکم بوہگءَ اِنت ، سٹاک مارکیٹ دیما شتگ، کرنٹ اکاءونٹ ءِ نقصان کم بوتگ ۔ درآمدات گیش بوہگءَ اَنت، زرکاری گیش بوہگءَ اِنت ۔ مے راستیں نیمگے ء َ رہادگ اَنت ۔ آمدنی گیش بیتء ُ ٹیکس وصولی ءَ گیشی بیت ۔ مزن وزیر ءَ گشتگ کہ بجلی دزّی ءَ را گرء ُدار کنگءِ ھاترتءَ کتگیں گامگیج ءَ چہ 120ارب کلدار وصول بوتگ اَنت، ایشی ءِ سرءَ بجلی ءِ بنجاہی وزیر عمر ایوب خان مراد باتءِ حقدار اِنت ۔ گواتءَ چہ 310میگاواٹ بجلی پیداک کنگءِ6منصوبہ آنی سرءَ 45کروڑ ڈالر ءِ حرچ کیءت، اے منصوبہ میاں اوستمانی مالیاتی کارپوریشن ء ُ میاں اوستمانی بینک ءِ کمک ءَ چہ سرجم کنگ بنت، دوئیں مالیاتی ادارگ 32کروڑ ڈالر ءِ بندوبستءَ کناں ۔ اے منصوبہ آں چہ جوانیں ارزانیں توانائی دست کپاں ۔