پشاور ۔ 14نومبر (اے پی پی) بنجائی وزیر اینٹی نارکوٹکس و سیفران شہریار خان آفریدی پارینے کہ منشیات آتا برخلاف جنگ اٹی اینٹی نارکوٹکس فورس و ایلو تعلقدار ادارہ غاتا کوشست آک سفت نا قابل ءُ، منشیات نا کاریم اٹ اتوک آ ودوک آ رجحان ننا راج خاص کر ورناچین ءِ دیمک آنبار خورک کننگ ءِ، دا ناسور آن بروک آ چین ءِ بچفنگ نا خاطر دقیقہ فروگزاشت کپنہ، تدوک آسال منشیات نا ہرابھلا کچ ءِ ضبط کننگا او منشیات نا برخلاف حکومت نا عزم و اے این ایف نا انتھک خواری ءِ ظاہر کیک ، منشیات نا مروک دندہ ٹی اوار عنصر آتا بیخ ءِ کشسا قرارواقعی سزا تننگ اٹ ہر حد اسکان کانہ ۔ اینٹی نارکوٹکس فورس تینا چنکو نفری و کچ اٹنگا وسیلہ غاتیان پد ہم منشیات و دامکروہ دھندہ ٹی اوار بندغ آتا برخلاف بے پرخ کارروائی ءِ برجاتخانے، ڈرگ فری سوساءٹی نا وژن ءِ ہرحال اٹ عملی دروشم اس ایتنہ، منشیات کون آ ڈوہ انا بیخ ءِ کشنگ کن بحیثیت پاکستانی نن غٹ دا خیر انا کاریم اٹ بایدے تینا بشخ ءِ شاغن ۔ داخیال آتا درشانی ءِ او اینٹی نارکوٹکس فورس انا کنڈآن منشیات نذر آتش کننگ نا بابت اڈ ہلوک آ دیوان آن تران کرسا کرے ۔ داوخت آ ڈائریکٹر جنرل اینٹی نارکوٹکس فورس میجر جنرل عارف ملک، کمانڈنٹ اینٹی نارکوٹکس فورس خیبر پختونخوا بریگیڈیئر متین احمد مرزا، باچا خان انٹرنیشنل ایئر پورٹ پشاور نا جنرل منیجر عبدالرحمان عباسی و ڈاکٹر انتخاب عالم ئسک ہم ساڑی ئسر ۔ یات سلے کہ دود اٹی کم و ود 16ٹن منشیات آتے خاخر تننگا، داسال اینٹی نارکوٹکس فورس 344مقدمہ غاتے درج کرے و سزا نا کچ 98 درسد ئس، اینٹی نارکوٹکس فورس منشیات فروش آتا اسمگلنگ نا کمک اٹ جوڑ کروک آ 52;46;677ملین روپئی نا میرات آتے منجمد کرے ۔ بنجائی وزیر شہریار خان آفریدی پارے کہ منشیات نا توننگ نا کوشست آتے مچ آ دنیا امنا کیک ۔ منشیات نا برخلاف پاکستان 32ملک آتون تین پہ تینی یات داشت نا معاہدہ غاتیا دستخط کرینے ۔ اوپارے کہ ننا ورناک شہیدی نا جام ءِ نوش کریر ولے منشیات فروش و منشیات آتا بیخ ءِ پٹار، مستین نا حکومت آک دا ڑکاریم کتوس ۔
