لاہور ۔ 14نومبر (اے پی پی) پاکستان تحریک انصاف نا سینئر مرکزی راہشون و مسکوہی بنجائی وزیر ہمایوں اختر خان پارینے کہ مولانا فضل الرحمان تینا سیاست ءِ بند گلی ٹی دِکہ تسنے و الس نا ہردے ئی و کاروباری زند ءِ ژند کننگ نا کوشست اونا بے سہبی تا شاہدی اسے، نواز شریف ءِ حکومت انسانی بنداو تیا آسان کسر آ فراوان کرے، نواز شریف نا برخلاف عدالت آتے ٹی ہرا کیس آک اریر او 7 ارب روپئی آن کیہی زیات زر انا ءُ و ہرا شورٹی بانڈ نا خواست ءِ کننگانے او اودے چندی کیس آتے ٹی مروک آ جرمانہ غاتا پیسہ غاک ءُ ۔ داخیال آتا درشانی ءِ او ہندی ہوٹل اٹی اڈ ہلوک آ دود آن تران کرسا کرے ۔ اوپارے کہ مولانا فضل الرحمان تینا خواست آتا بابت اولیکو دے آن تذبذب نا گواچی ءِ و بنجائی دارالحکومت اٹی پڑاءو ءِ چٹفنگ آن پد مچ آ ملک اٹی کسر تے بند کننگ نا پڑو اونا ہبکہ ئی نا عکاسی ءِ کیک، اگہ الس نا ہردے ئی زند و کاروبارءِ ژند کننگ نا کوشست کننگا تو کانود نافذ کروک آ ادارہ غاک ضرور حرکت اٹی بریرہ و اونا برخلاف زیروٹالرنس ءِ ، دُن انگا حالیت آتے ٹی ہراتم اسٹاک ایکسچینج اٹی ترندی بننگ ءِ ، زرگزران نا بابت آن جہانی ادارہ غاتا است بڈ رپورٹ مون آ بننگ ءِ مولانا فضل الرحمان ملکی شونداری ٹی اڑاند شاغنگ کن کوشست کننگ ءِ، داوڑنا چم آتیان جمہوریت سوگو مفک ۔ اونواز شریف نا پیشن ناملک آ روانگی نا معاملہ ٹی ڈیڈلاک نا بابت پارے کہ نواز شریف سزایافتہ ءِ ولے حکومت عدالت نا کنڈآن اودے طبی بنداو تیا ضمانت ملنگ آن پد انسانی ہمدردی نا رداٹ آسان کسر اس فراوان کرے ہرادے اوفک تینٹ پیچیدہ کریر، نواز شریف نا جان جوڑی تشویشناک ءِ ، مسلم لیگ (ن) تو اسہ نن اس ہم بایدے زیان کپ ۔
