
اسلام آباد ۔ 14نومبر (اے پی پی) پاک بحریہ نا ترجمان پارینے کہ امیر البحر ایڈمرل ظفر محمود عباسی قطر انا دورہ نا آخیریکو دے اٹی اہم اوڑدہی کرے و جوائنٹ کمانڈ اینڈ اسٹاف کالج اٹی خصوصی تران ہم کرے ۔ پنچ شنبے نادے آ پاک بحریہ نا ترجمان نارداٹ نیول چیف کمانڈر قطر ایئر فورس و کمانڈنٹ جوائنٹ کمانڈاینڈ اسٹاف کالج تون جتا جتا اوڑدہی کرے ۔ اوڑدہی تیٹی تین پہ تینی است خواہی نا معاملہ بشمول ہڑتوم آ کنڈآتا فوجی کمکاری آ گپ و تران کننگا ۔ نیول چیف ہڑتوم آ ملک آتا فوج آتا نیام اٹ رابطہ غاتے پین سوگو کننگ آ زور شاغا ۔ ترجمان پاک بحریہ نا رداٹ سروک پاک بحریہ جوائنٹ کمانڈ اینڈ اسٹاف کالج اٹی کورس انا بشخ ہلوک آتیان خصوصی تران ہم کرے ۔ تینا تران اٹی نیول چیف دنیا و ڈیہہ نا بدلینگوک آ سیکورٹی حالیت آتا احاطہ ءِ کرے و دارداٹ تین پہ تینی تعلقداری تا اہمیت ءِ تالان کرے ۔ ترجمان پاک بحریہ نا رداٹ امیر البحر تینا تران اٹی مسلم امہ نا بڑزکو ہند انا دُوارہ دوئی کننگ ءِ کڑد انا پکائی، اللہ غا پورو یخین و سنت رسول ﷺ نا پیروی تون مشروط کرے ۔ نیول چیف نا دا دورہ ہڑتوم آ ملک آتا سلہہ بند فوج آتا نیام اٹ تعلقداری تے پین مون آ دیک ۔