اسلام آباد ۔ 14نومبر (اے پی پی) وزیراعظم نا خصوصی کمکار حوالکاری وشین کاری ڈاکٹر فردوس عاشق اعوان پارینے کہ کانود نا رداٹ محمد نواز شریف نا پدی نا ضمانت ءِ بٹنگ انگانے، نن اسہ ناجوڑ ءُ بندغ اسے نا جان جوڑی آ سیاست کننگ نا قائل افن،شہباز شریف انانا خول آن پیش تمسا ایلم نا جان جوڑی آ زموارانہ رویہ اس اختیار کے، سیاست ولدا ہم مرسا کیک ولے انسانی جان زیات نہادی ءِ، مولانا فضل الرحمان نا پلا ن بی ہم پلان اے آنبار بے سہب و نامراد ثابت مریک ۔ داخیال آتا درشانی ءِ او پنچ شنبے نادے آ اسلام آباد ہائی کورٹ اٹی پیشی آن پد عدالت نا پیشن آ میڈیا تون گپ وتران کرسا کرے ۔ خصوصی کمکار پارے کہ تدوک آدے آن نواز شریف نا پیشن نا ملک آ درمان کن روانگی نا بابت سیاسی بیان بننگ ءِ، ہندن ءُ تاثر اس تننگا کہ شورٹی بانڈز انا مسخت سیاسی فائدہ اس دوئی کننگ ئس ہرا غلط ءِ ۔ اوپارے کہ وزیراعظم نواز شریف نا جان جوڑی آ سیاست کننگ آن غٹ ءِ منع کرین ۔ نواز شریف ءِ بیرہ انسانی بنداو آ درمان کن پیشن نا ملک آ ہِننگ نا موکل تننگا ۔ اوپارے کہ جنرل پرویز مشرف و نواز شریف نا کیس آتے ٹی بنداوی ءُ پرخ اسے ۔ جنرل پرویز مشرف عدالت اسے آن سزایافتہ الوکہ نئے اونا پن ای سی ایل اٹی ئس ۔ نواز شریف عدالت آتیان سزا یافتہ ءِ و اونا پن ای سی ایل اٹی ئس ۔ خصوصی کمکار پارے کہ بانڈز اسہ کانودی ءُ خواست اسے ہرانا سیاست تون ہچ ءُ تعلق اس اف ۔ بانڈز اٹی کیش پیسہ غاتا خواست کننگتنے، کانود نا رداٹ پدی بننگ نا گارنٹی ءِ خواہنگ انگا ۔ اوپارے کہ نن اسہ ناجوڑ ءُ بندغ اسے نا جان جوڑی آ سیاست کننگ نا قائل افن ۔ مولانا کن دعاکننگ اُن کہ اللہ اودے ملک انا سلامتی و شونداری نا بابت گچین فیصلہ کننگ نا توفیق ایتے ۔ ڈاکٹر فردو س عاشق اعوان پارے کہ مولانا نا پلان بی ہم پلان اے آنبار بے سہب و نامرا دثابت مریک ۔ الس سیاسی فنکارآتا فنکاری آن معلومدار ءِ ۔ وزیراعظم عمران خان تباہ حال زرگزران ءِ سوگو کرے ۔ اوپارے کہ الس ملکی شونداری نا سفر اٹی ہچ کس ءِ اڑاند شاغنگ کن الیپک ۔ مولانا فضل الرحمان بیرہ 13 نا سکور آ ہی بولڈ مس ۔
