اسلام آباد ۔ 14نومبر (اے پی پی) وزیراعظم نا سلاہکار خزانہ ڈاکٹر عبدالحفیظ شیخ پارینے کہ شونداری و شونہالی کن نجی بشخ انا کاریمی مننگ و ہزگار تپہ نا تینا ملک اٹی زرکاری المی ءِ، ساڑی آ عالمگیریت نا دور اٹی اسہ ملک اس ہم تنیا شون ہلنگ کپک ، شونداری و شونہالی کن تزویراتی شریداری بنداوی شڑت مریک، شونداری و شونہالی کن ہر ملک انا نجی بشخ انا کاریمی مننگ المی ءِ ۔ داخیال آتا درشانی ءِ او پنچ شنبے نادے آ داڑے اسلام آباد پالیسی ریسرچ انسٹیٹیوٹ نا کنڈآن جہانی امن و شونداری کانفرنس نا بنائی سیشن آن بطور مہمان خاص تران کرسا کرے ۔ سلاہکار خزانہ سعودی عرب ، چین و ترکی آن بیدس ایلو شون ہلوک ملک آتا مثال ترسا پارے کہ منہ عشرہ مست دا ملک آک ہراتم شونداری نا سفر نا بناءِ کریر ہمووخت آ اوفتے ہچ کس تتوکہ ولے تین پہ تینی شریداری نا فارمولاغا عمل کرسا دا ملک آک شون ہلکر ۔ سعودی عرب ہرادے بیرہ مذہبی لحاظ اٹ مقدس ہند اسے نا اعتبار اٹ چاہنگاکہ اودے ہم شونداری کن ایلو ملک آتون کمکاری ءِ مون آ دروئی تما و اینو دنیا دا ملک آتا مثال آتے پیش کیرہ ۔ اوپارے کہ شون ہلوک ملک آتے ٹی سہی وڑاٹ انسانی بنداو تیا زرکاری نا گرج ءِ تانکہ ایلو ملک آتے اوفتا شون ہلوک مک آتا صف اٹ اتنگ مرے ۔ اوپارے کہ پاکستان اٹی معاشی حالیت آتا دگرگو ں حالیت آتا سوب آن اینو ننے معاشی مشکلات مون تروک ءِ ۔ اوپارے کہ اینو نا دور اٹی اسہ ملک اس ہم تنیا شون ہلنگ کپک داڑکن تزویراتی شریداری اہم مریک،ہرا امن و شونداری نا بنداوی شڑت ءِ ۔ اوپارے کہ شونداری و شونہالی کن ہر ملک انا نجی بشخ انا کاریمی مننگ المی ءِ انتئے کہ ہراوخت اسکان ہزگار تپہ تینا ملک اٹی زرکاری کپک ہمووخت اسکان شون ہلنگ ممکن اف ۔
