اسلام آباد ۔ 13نومبر (اے پی پی) وزیراعظم عمران خان پارینے کہ خراج نظام اٹی گچینی کن الس اٹی پت انا مون آ دننگ المی ءِ، نیمہ خراج محصولات وام تا ادائیگی ٹی خڑچ مریرہ، خلقت تون پیسہ ارے ولے نن اودے خراج نظام اٹی اوار کننگ کتون، ننے خراج ادائیگی ءِ قومی فرض اس تکوئی مریک، خراج محصولات آتے ودفنگ تو شدید مالی مشکل آتون مون تروئی مریک، ہراوڑاٹ ہم چلینگ انگ اُن داوڑ ملک مون آ ہِننگ کپک ، ہراوخت اسکان حکومت آ پت مفک خلقت خراج تفسہ ۔ داخیال آتا درشانی ءِ او ایف بی آر آفیسر آتیان تران کرسا کرے ۔ وزیراعظم عمران خان پارے کہ پاکستانی قوم شوکت خانم ہسپتال کن غٹ آن زیات پیسہ تس، نمل یونیورسٹی ٹی 70 درسد طالب علم مفت تعلیم کننگ ءُ ۔ اوپارے کہ پاکستانی الس دنیا نا غٹ آن زیات عطیہ تروک ءُ قوم اسے، انت سوب ءِ کہ پاکستانی قوم خیرات تو ایتک ولے خراج محصولات کم ءِ ، اوپارے کہ نن حکومت ءِ سنبھالان تو ریکارڈ مالیاتی نسخان نا مون تروک ئس ، نن تون پبی انسانی وسیلہ ساڑی ارے، ورناتے تعلیم ملے تو ملک بڑزاکاہک، ننے ملکی وسیلہ غاتا شونداری کن وسیلہ غاتا کمتی نا مون تروک ءِ ۔ وزیراعظم پارے کہ نیمہ خراج محصولات وام تا ادائیگی ٹی خڑچ مریرہ ، خلقت تون پیسہ ارے ولے نن اوفتے خراج نظام اٹی اوار کننگ کتون ۔ داوخت آ وزیراعظم نا خصوصی کمکار حوالکاری وشین کاری ڈاکٹر فردوس عاشق اعوان ، سلاہکار خزانہ ڈاکٹر حفیظ شیخ ، ایف بی آر نا چیئرمین شبر زیدی، سلاہکار واپار عبدالرزاق داءود و سینئر عہدیدار آک ہم ساڑی ئسر ۔
