اسلام آباد ۔ 13نومبر (اے پی پی) وزیراعظم عمران خان پارت کرینے کہ شونداری فنڈ آتا کاریم اٹ اتنگ ءِ المی کننگ کن وزارت ڈٹ بندی ماہانہ رپورٹ اس پیش کے، ڈٹ آتا زوت پوروی آن زرگزران سوگو مریک، درکار ہدف نا دوئی کننگ کن گچین پالیسی جوڑ کننگے ۔ دا پارت ءِ او چارشنبے نادے آ وزیراعظم آفس اسلام آباد اٹی پبلک سیکٹر ڈویلپمنٹ پروگرام (پی ایس ڈی پی) آ پیش رفت نا جاچ ءِ ہلنگ کن دیوان نا کماشی ءِ کرسا تس ۔ دیوان اٹی وزیر ڈٹ بندی مخدوم خسرو بختیار، وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان و ایلو بڑزکو کمامدارآک ہم ساڑی ئسر ۔ دیوان اٹی وزیراعظم ءِ پبلک سیکٹر ڈویلپمنٹ پروگرام آ حوال تننگا ۔ دیوان اٹی پاننگاکہ پی ایس ڈی پی نا رداٹ مالی سال 2019-20ء کن 701 ارب روپئی جتا کننگانے، منظور مروک ڈٹ آتے ٹی ہرے ءِ مر کننگ کن گام گیج کننگانے، 2 ارب روپئی آن کم انا خڑچ انا ڈٹ آتے ٹی ترندی کن تعلقدار سیکرٹری تے اختیار تننگانے ۔ وزیراعظم عمران خان پبلک سیکٹر ڈویلپمنٹ پروگرام نا رداٹ بنجائی حکومت نا کنڈآن جتا کروک فنڈ انا زیات آن زیات و وخت آ کاریم اٹ اتنگ ءِ المی کننگ نا گرج آ زور شاغسا پارے کہ ڈٹ بندی چیف ایگزیکٹو نا خف و خنک ءُ ۔ دیوان ءِ پاننگاکہ منظور مروک ڈٹ آتیا عملدرآمد ءِ المی کننگ کن پلاننگ کمیشن نا کمک اٹ اختیار آتے ٹی تاخیر ءِ چٹفنگ کن پبی کوشست کننگ انگ ءِ ۔ دیوان ءِ چندی وزارت و ڈویژن آتا کنڈآن فرسٹ کوارٹر ریلیز نا کاریم اٹ اتنگ نا جاچ ءِ ہلنگ کن تیار کروک سرجم رپورٹ نا بارواٹی پاننگا ۔
