اسلام آباد ۔ 13 نومبر (اے پی پی) بنجاھی وزیر برائے کانود ءُُ انصاف بیرسٹر فروغ نسیم ءَ گوشت کہ حکومت ءَ بنی آدمی یکوئی ءِ رد ءَ میاں نواز شریف ءَ را چار ھپتگ آنی واستہ ڈن ملک ءَ علاج ءِ واستہ روگ ءِ اجازت دیگ ءِ پیسلہ کتگ، آئی ءِ نام ای سی ایل ءَ چہ در کنگ نہ بوتگ بلکینگ ءَ یک رند ءِ ڈن ملک ءَ روگ ءِ اجازت دیگ بوتگ، آ 7 ارب کلدار ءِ شورٹی بانڈ جم کنگ ءَ پد ملک ءَ چہ ڈن شُت کنت، وکیل ڈاکٹر آنی داتگیں سوج ءُُ آمید گس ءِ پیسلہ ءِ رد ءَ آئی ءَ را ڈن ملک روگ ءِ پیسلہ کنگ بوتگ ۔ اے ھیالانی درشانی آئی ءَ چار شمبے ءِ روچ ءَ مزن وزیر ءِ ھاسیں کمکار برائے کیاسگر شہزاد اکبر ءِ ھمبراھی ءَ پریس کانفرنس ءَ گوں تران کنان ءَ کت ۔ آئی ءَ گوشت کہ وزارت ءِ توکی کار ءَ را میاں شہباز شریف ءَ نواز شریف ءَ را ڈن ملک ءَ روگ ءِ واستہ دزبندی جم کتگ ءُُ ایشی ءِ گوما میڈیکل سٹی ءِ میڈیکل رپورٹس ھمبراھ جم کتگ اَنت، ایس سی ایل ءَ چہ نام در کنگ بنجاھی کابینہ ءِ جھلی کمیٹی ءِ کار انت، جھلی کمیٹی ءِ توک ءَ اے دزبندی ءِ سر ءَ زوتیں رنگ ءَ کاروائی کنان ءَ شریف میڈیکل سٹی، سرکاری میڈیکل بورڈ، وکیل آنی داتگیں سر ءُُ سوج گرگ بوتگ وھدیکہ پیسلہ آناں ھم ھواری ءَ چار گ بوتگ ۔ آئی ءَ گوشت کہ کمیٹی ءَ گوشگ بوت کہ میاں نواز شریف ءِ جان سلامتی ءِ سک باز نادُراھی ءِ آماچ انت، آئی ءَ را سِلیں نادُراھی گون آئی ءِ علاج ایوک ءَ ڈن ملک ءَ بوت کنت ۔
