اقوام عالم تینا فائدہ غاتا جاگہ غا انسانیت نا فائدہ غاتے ٹی فیصلہ کے،
اسلام آباد ۔ 13نومبر (اے پی پی) صدر مملکت ڈاکٹر عارف علوی پارینے کہ انسانیت ءِ کیہی چیلنج آک مون تروک ءُ، گڑاس قوم ولداہم تینا فائدہ غاتا سجفنگ ءُ، اکثر کثیر القومی کمپنی ملک آتیان زیات واکدار مسنو، اقوام عالم تینا فائدہ غاتاجاگہ غا انسانیت نا فائدہ غاتے ٹی فیصلہ کے ۔ داخیال آتا درشانی ءِ او چارشنبے نادے آ داڑے ڈیہہ ٹی امن و سلامتی نا بابت سیمینار آن تران کرسا کرے ۔ صدر مملکت پارے کہ جوان انگا ہمسایہ اسہ نعمت اس مریک و امن و سلامتی نا سیبو جوان انگا تعلقداری تیا مریک ۔ چناتا ذہن تیٹی امن و مابت نا مون آ دننگ المی ءِ ۔ چناک خار و تعصب آن پاک چاگڑد اٹ پرورش کیرہ تو داڑان اوفتے ٹی امن ، سنگتی و مابت نا جوزہ ودی مریک ۔ پاکستان اوغانستان نا 35لکھ پناہ گزین آتا میزبانی ءِ کرینے و ہنداوڑ اینو شام اٹی ہم 35لکھ آن زیات پناہ گزین ءُ ۔ اوپارے کہ اقوام عالم تینا فائدہ غاتا جاگہ غا انسانیت نا اجتماعی فائدہ غاتا بنداو آ بایدے فیصلہ کے ۔ انسانی چین ءِ کیہی ویل آک مون تروک ءُ نن گڑاس قوم تیا ہم بیرہ تینا فائدہ غاتے ٹی سجفنگ اُن ۔ اکثر کثیر القومی کمپنی ملک آتیان ہم زیات واکدار مسنو و او بھاز انگا معاملہ غاتے ہائی جیک ہم کیرہ ۔ گلوبل وارمنگ کون آ ویل آک ہم ننے مون تروک ءُ، داکنڈاہم چکار کننگ نا گرج ءِ ۔ اوپارے کہ لیگ آف نیشن آن پد نن خنان کہ اقوام متحدہ نا قیام ءِ عمل اٹ اتنگا ۔ دنیا ٹی گڑاس قوم تینا فائدہ غاتے کن انتس کہ کننگ ءُ داڑا سجفنگ نا گرج ءِ ۔ اولیکو و ارٹ میکو جنگ عظیم اٹ بھاز بھس کاری مس و ناگا ساکی و ہروشیما ٹی ایٹم بمب ءِ کاریم اٹ اتنگا ۔ شون ہلوک و نیزگار ملک آتے ٹی زند انا جتا جتا قدر ءُ و گرج دا ہیت انا ءِ کہ تینا فائدہ غاتا جاگہ غا انسانیت ءِ اولیت ایتر ۔ اوپارے کہ کشمیر نا ویل آ اقوام متحدہ نا کیہی قرارداد آک ساڑی ءُ ۔ اوپارے کہ پاکستان دہشت گردی نا برخلاف بھلو قربانی تسنے و نن سرسہبی اتون دہشت گردی نا مون ءِ تورینن و دادے چٹفنگ اٹ 30 سال انا وخت خڑچ مسنے ۔ صدر مملکت پارے کہ باکو ٹی بنگلہ دیش نا وزیراعظم تون اوڑدہی ٹی اوروہنگیا مسلمان تا معاملہ غا ہیت کریسس ۔ صدر مملکت تینا تران اٹی 1961ء ٹی ہشت می کلاس اٹی نوشتہ کروک تینا اسہ سرحال اسے خوانسا بنفے ۔ دا سرحال ءِ گچین ہمسائیگی نا سرحال آ نوشتہ کننگاسس ۔
