اسلام آباد ۔ 13نومبر (اے پی پی) وزیراعظم عمران خان پارینے کہ ملکی زرگزران سوگو مننگ ءِ، پاکستان اٹی درملکی زرکاری بننگ بناکرینے، حکومت درملکی زرکارآتے کن آسانی ودی کننگ ءِ، بروک آ مرحلہ ٹی ننے تینا ورناتے روزگار تروئی ءِ، چین اتون داخہ در گچین تعلقداری الوکہ دُن کہ داسہ ءِ، اسیجا ڈٹ آتا است بڈی ءِ کننگ اُن ۔ چارشنبے نادے آ داڑے میسرز ایم ایس ڈی ٹائر اینڈ ربڑ کمپنی ، میسرز ڈبل سٹار چائنہ و ڈائیوو پاکستان ایکسپریس بس سروس نا نیام اٹ پاکستان اٹی ٹیر تا تیاری نا مسہ کڑدہ ہی معاہدہ غا دستخط آتا دود آن تران کرسا وزیراعظم پارے کہ چین نا کمپنی نا کنڈآن پاکستان اٹی زرکاری نا ستاءِ کینہ ۔ اوپارے کہ روپئی نا قدر اٹی گچینی بسنے ۔ خوشی ءِ کہ ملکی زرگزران سوگو مننگ ءِ ۔ اوپارے کہ ہراتم حکومت ءِ سنبھالان تو زرگزران بھاز خراب حالیت اٹی ملا ۔ ڈالر نا مقابلہ ٹی پاکستانی روپئی نا قدر سوگو مسنے ۔ پاکستان اٹی درملکی زرکاری بننگ بناکرینے ۔ اوپارے کہ آئی ایم ایف، ایشین ڈویلپمنٹ بینک و جہانی بینک ننا معاشی سوگوی و پاکستان اٹی واپار ءِ آسان کننگ نا اعتراف ءِ کرینے ۔ ورلڈ بینک انا ساڑی آ رپورٹ اٹی واپار ءِ آسان کننگ نا بابت پاکستان نادرجہ بندی ٹی 28 درجہ گچینی بسنے ۔ وزیراعظم پارے کہ بروک آ مرحلہ ٹی ننے تینا ورناتے روزگار تروئی ءِ ۔ داڑکن نن پیشن نا زرکارآتے آسانی فراوان کننگ کن کوشست کننگ اُن ۔ زرکاری آن ہی روزگار نا وارخواہی دوبریک ۔ اوپارے کہ حکومت معاشی شونداری کن برآمد آتے ودفنگ کن کاریم کننگ ءِ ۔ اوپارے کہ پاکستان اٹی چینی زرکارآتے بخیر اٹ پانہ ۔ دامعاہدہ غان ٹیر ہرا مہالو اسمگل مرسا بسرہ داسہ داڑے جوڑ مریرہ ۔ ننے ٹیر درآمد کروئی تمپک بلکن داکان ٹیر برآمد کننگک ۔ داڑان ننا نہادی زرمبادلہ ہم بچک و کرنٹ اکاءونٹ نسخان نا مون ءِ توننگ اٹ ہم کمک رسینگک انتئے کہ داڑان روپئی نا قدرتمک و کبینی ودک ۔ اوپارے کہ نن داسہ سہی سمت آ روان اُن ۔ وزیراعظم پارے کہ دا چرجوئی ٹی وزیراعظم آفس زرکاری بورڈ و وزارت واپار بھاز کوشست کرینو ۔ نن زرکارآتے پاکستان اٹی زرکاری کن چکنگ اُن ۔ پاکستان اٹی زرکاری کروک آ چینی کمپنی تے خراج تحسین پیش کیوہ ۔ اوپارے کہ چین اتون داخہ در گچین تعلقداری الوکہ دُن کہ داسہ ءِ ۔ چینی کمپنی تتون اسیجا ڈٹ بناکننگ نا است بڈی ءِ کننگ اُن ۔ اوفتے کن آسانی ودی کننگ نا گرج ءِ ۔ زرکارآتے آسراتی ملپ تو او پین جاگہ سے آ کارہ ۔ نن پورو کوشست کننگ اُن کہ ملک اٹی زرکار دوست چاگڑد اس فراوان کین ۔
