اسلام آباد ۔ 12نومبر (اے پی پی) ڈپٹی اسپیکر قومی اسمبلی قاسم خان سوری تون ایڈووکیٹ عبداللہ سولنگی نا کماشی ٹی انصاف لائرز فورم اسلام آباد نا ڈل سے شنبے نادے آ پارلیمنٹ ہاءوس اٹی اوڑدہی کرے ۔ اوڑدہی ٹی ملکی جم اٹنگا حالیت آتیا گپ و تران کننگا ۔ داوخت آ گپ و تران کرسا ڈپٹی اسپیکر قومی اسمبلی پارے کہ وکیل آتا راج اٹی انصاف نا فراوانی ٹی کلیدی کڑد اسے ۔ اوپارے کہ وکیل آک ملک اٹی جمہوریت نا بحالی و سوگوی کن ہراخذمت آتے سرانجام تسنو او ستاکڑزرہ ۔ وکلاء برادری ءِ مون تروک ویل آتے اولیتی بنداو تیا ایسر کننگک، پاکستان اٹی آئین و کانود نا حکمرانی نا دور بناکرینے ۔ اوپارے کہ دنیا ٹی ہمو قومک سرسہبءُ ہراکانود و انصاف نا حکمرانی ءُ، ساڑی حکومت ملک اٹی آئین و کانود نا حکمرانی آ باورکیک و وزیراعظم عمران خان نا کماشی ٹی ملک ءِ سہی وڑاٹ قائد نا پاکستان جوڑ کننگ کن کوشست کننگ ءِ ۔ ڈل اٹی بشخ ہلوک آک ڈپٹی اسپیکر نا منت واری ءِ ہرفیر و حکومت نا الس دوست پالیسی تا ستاءِ کریر ۔ ڈل اٹی ایڈووکیٹ عبداللہ سولنگی آن بیدس ایڈووکیٹ مقصود علی خان، ایڈووکیٹ سیدوجاہت عباس بخاری، ایڈووکیٹ چوہدری فیصل محمود، ایڈووکیٹ نوروزخان ، ایڈووکیٹ ارشاد احمد، ایڈووکیٹ عدنان احمد خان یوسف زئی، ایڈووکیٹ خلیق صدیقی، ایڈووکیٹ آمنہ علی، ایڈووکیٹ طلعت رضوان سیال، ایڈووکیٹ کلثوم خالق، حنا احمد، قیصر جدون، عتیق الرحمان صدیقی، سردار مصروف خان ، ملک نسیم عباس و راجہ یاسر علی اوار ئسر ۔
