اسلام آباد ۔ 12نومبر (اے پی پی) وزیر خارجہ شاہ محمود قریشی پارینے کہ مقبوضہ کشمیر اٹی مظلوم کشمیریک تدوک آ 100 دے آن بھارتی ظلم و جور انا پلویڑ اٹی ءُ، مظلوم کشمیری تے بھارتی استبداد آن نجات ترفنگ کن جہانی برادری و انسانی حق انا علمبردار جہانی تنظیم تے مون آ برسا گچین گام گیج کروئی مریک ۔ سے شنبے نادے آ مقبوضہ جموں و کشمیر نا بابت وزیر خارجہ اسہ خصوصی ءُ کلہو اسے ٹی پارے کہ اینو مقبوضہ جموں و کشمیر اٹی بھارت نا کنڈآن جاری پدریسہ کرفیو ءِ سد دے گدرینگانے ، مودی سرکار تدوک آ سد دے آن 80لکھ کودک کشمیری تے گھٹ کرینے، تدوک آ سد دے آن مظلوم کشمیری، بھارتی ظلم و جور انا پلویڑ اٹی ءُ ۔ اوپارے کہ کودک چناو زالبول آتے بیدادی نا شست کننگ انگ ءِ، پدریسہ کرفیو نا سوب خور و دوائی تسکان رسینگ دوئی مفننگ نا سوب ہر کنڈا مرک انا تہاری تالان ءِ ۔ شاہ محمود قریشی پارے کہ اسہ کنڈ پاکستان مہر و مریبت نا راہداری تے ملنگ ءِ تو ایلو کنڈ جمہوریت و رواداری نا دروغ انا دعویدار ، بھارتی سرکار نا کنڈآن مقبوضہ جموں و کشمیر اٹی نماز جمعہ و عئید انا نماز نا خواننگ آ پابندی خلنگ انگ ءِ، مسیت آتے بند کننگانے ، محرم الحرام و عئید میلاد النبی نا جلوس اسکان پیش تمنگ کن ہلنگ تو ۔ لکھ آ کودک، مظلوم کشمیری تے بھارتی ظلم و جور آن نجات ترفنگ کن جہانی براردی و انسانی حق انا علمبردار جہانی تنظیم تے مون آ برسا گچین گام گیج کروئی مریک ۔ وزیر خارجہ پارے کہ مقبوضہ جموں و کشمیر اٹی تدوک آ سد دے آن بین و ملاس قیدوبند نا صعوبت آتے سگوک آ کودک کشمیری تا عزم و ہمت ءِ سلام پیش کیوہ و اوفتے باوری کرفیوہ کہ ہراوخت اسکان اقوام متحدہ نا قرارداد آتا رداٹ اوفتے اوفتا حق خودارادیت دوئی مفک، پاکستان تینا کشمیری ایلم تا کانودی اخلاقی و سفارتی کمکاری ءِ برجاتخک ۔
