اسلام آباد ۔ 12نومبر (اے پی پی) وزیر اعظم نا خصوصی کمکار راجی رکھ و نیزگاری نا چٹفنگ و چیئرپرسن بی آئی ایس پی ڈاکٹر ثانیہ نشتر راج آ اثر شاغوک پوسکن آ مالی گام گیج نا بابت گول میز کانفرنس اٹی مرکزی اسپیکر نا حیثیت اٹ بشخ ہلک ۔ گول میز کانفرنس نا انعقاد اسلام آباد اٹی پاکستان سنٹر فار فلانتھراپی (پی سی پی) و ڈوءچے گیسل شیفٹ فر انٹرنیشنل زوسامیناربیٹ اواری وڑاٹ کریر ۔ پروگرام اٹی احساس پروگرام کمیٹی نا باسک آک بشخ ہلکر ہرا کارپوریٹ سیکٹر، مخیر خواجہ، آئی این جی اوز و قوام متحدہ نا ایجنسی تتون ہڑتوم آ کنڈآتا و کثیر الجہتی کمکاری نا ذریعہ پوسکن آ مالیاتی نظام اس ٹہیفنگ ءُ ۔ گول میز کانفرنس نا بنداوی مسخت داہیت انا کساس ءِ خلنگ ئس کہ 2030 ء اسکان پائیدار شونداری ہدف آتا دوئی کننگ کن پاکستان ہراوڑاٹ شونداری بشخ انا چاہنداری و زرکارآتیان فائدہ ہرفنگ کیک ۔ داوخت آ تران کرسا ڈاکٹر نشتر پارے کہ دا المی ءِ کہ پاکستان احساس پروگرام کن پوسکن آ مالیاتی ماڈل ءِ تینا کے تانکہ داڑان راج ءِ زیات آن زیات فائدہ مرے و لکھ آ بندغ آتے نیزگاری آن پیشن کشنگ نا مشن پورو مننگ کے، انسانی دوستی و راجی زرکاری کن گچین حکمت عملی ، کمکاری و نتیجہ غا مبنی نقطہ نظر تون نن داہیت ءِ المی کننگ کینہ کہ اہم راجی ویل آتون مون تننگ کن وسیلہ غاتے ہرحد اسکان گچین وڑاٹ کاریم اٹ اتنگے ۔ گول میز کانفرنس اٹی پاکستان اٹی معاشی و اقتصادی سوگوی کن پوسکن آ مالیاتی ماڈل و وڑوڈول آ گپ و تران کننگا، زرکاری کن اولیتی بشخ آتا پیدواری ءِ کننگا و داہیت انا تجزیہ ءِ کننگاکہ پوسکن آ مالیاتی نظام کن ہرا عوامل آک پاکستان نا بابت جوان ءُ ۔ گول میز کانفرنس اٹی مروک آ سلابت احساس پروگرام نا رداٹ ٹہیفوک آ پوسکن آ مالیاتی نظام اٹی اہم کڑد ادا کیک ۔ پی سی پی جان جوڑی ، تعلیم و راجی آسودہی کن پوسکن آ مالیاتی ماڈل پیش کروک آ اسہ ذیلی کمیٹی اسے ۔
