بلوچستان تون اوار مچ آ ملک اٹی برقی گرج آتے پورو کننگ کن وسیع المدتی و گونڈ وختی ڈٹ آتیا کاریم برجاءِ ہرافتا پوروی آن بجلی نا رسد و طلب اٹی توازن ودی مریک ، وزیراعظم پاکستان نا خصوصی کمکار آبی وسیلہ و توانائی سردار یار محمد رند

کوءٹہ ۔ 11نومبر (اے پی پی) وزیراعظم پاکستان نا خصوصی کمکار آبی وسیلہ و توانائی سردار یار محمد رند پارینے کہ بلوچستان تون اوار مچ آ ملک اٹی برقی گرج آتے پورو کننگ کن وسیع المدتی و گونڈ وختی ڈٹ آتیا کاریم برجاءِ ہرافتا پوروی آن بجلی نا رسد و طلب اٹی توازن ودی مریک و کارخانہ غاتون اوار اُرائی صارف آتے حسب ضرورت بجلی دستیاب مریک، داخیال آتا درشانی ءِ او بلوچستان نا ضلع کچھی نا تحصیل ڈھاڈر اٹی 132 کے وی گریڈ اسٹیشن نا بنائی دود آن تران کرسا کرے دا ڈٹ مسہ ارب روپئی نا بھلو زر اسے آن اِراسال اٹی پورو کننگک ڈٹ انا پوروی آن ضلع کچھی تون اوار اِرا گردونواح نا اسہ سد آن زیات خلق فائدہ ہرفرہ ڈٹ انا بنائی دود آن تران کرسا سردار یار محمد رند پارے کہ گریڈ اسٹیشن نا جوڑ کننگ ضلع کچھی نا الس نا متکن خواست ہرادے اینو وزیراعظم عمران خان پورو کرینے وزیراعظم عمران خان شوران آ بننگ نا وخت آ شوران کن گریڈ اسٹیشن اس تننگ نا پڑو ءِ کریسس ولے وسیع تر السی فائدہ ٹی دا گریڈ اسٹیشن ءِ شوران نا جاگہ غا ڈھاڈر اٹی جوڑ کننگ نا فیصلہ کرینے تانکہ دا میگا پروجیکٹ آن زیات آن زیات خلقت فائدہ ہرفنگ کیر اوپارے کہ مستین اٹی الس نا وونٹ آتے اٹ گچین مروک آ نمائندہ غاک عملا الس کن ہچ اس کتوس الحمد اللہ نن مدام الس نا اجتماعی کاریم تے اہمیت تسونن و میرٹ آ شونداری حکمت عملی اس جوڑکرسا وسیلہ غاتا درست کاریم اٹ اتنگ ءِ المی کرینن سردار رند پارے کہ مستین اٹی بلوچستان ناشونداری وسیلہ غاتے الس نا آسودہی نا جاگہ غا تینا جیب تا زینت جوڑ کننگا ہراوخت اسکان بلوچستان ءِ پلوک آتا سخت احتساف مفک ہمووخت اسکان بلوچستان شون ہلنگ کپک اوپارے کہ ملک انا مسہ صوبہ غاتے ٹی دُز آتا برخلاف احتساب کننگ انگ ءِ، ولے بلوچستان اٹی دز آتا برخلاف داوخت اسکان خاطر خواہ کارروائی نا کمتی ءِ اوپارے کہ بلوچستان نا الس تون 70 سال آن بیدادی نا چرجوئی برجاءِ داڑے جا ن جوڑی نا آسراتی ءِ نئے تعلیم کن سازگار چاگڑد ارے داڑے اسہ بلوچ یا پشتون اس دادے وخت اس ہم سگپک، کہ لمہ یا ایڑھ اس چناءِ روڈانا کنارہ غا ودی کے سردار رند پارے کہ عہدہ غا مرین یا مفن صوبہ نا الس نا حق اکن ہیت کرسا کینہ اوپارے کہ پسماندگی بلوچستان و کچھی نا الس نا مقدر اف الس ءِ پسماندگی نا تہاری آن کشنہ ۔