حلقہ این اے 259 نا ضمنی گچین کاری تیٹی بشخ ہلوک آ اومیتدار 15و 16نومبر نا نیامی نن تینا گچین کاری مہم ءِ چٹفر، الیکشن کمیشن

اسلام آباد ۔ 11نومبر (اے پی پی) الیکشن کمیشن قومی اسمبلی نا حلقہ این اے 259 ڈیرہ بگٹی ٹی 29 پولنگ اسٹیشن آتیا مروک آ ضمنی گچین کاری تیٹی بشخ ہلوک آ اومیتدار آتے پارت کرینے کہ او 15و 16نومبر نا نیامی نن تینا گچین کاری مہم ءِ چٹفر ۔ داکان پد ہروڑنا گچین کاری مہم ءِ چلیفوک آ اومیتدار ءِ گچین کاری کانود 2017 ء نا رداٹ سزا تننگ مریک ۔ الیکشن کمیشن آن جاری پریس ریلیز نا رداٹ این اے 259 ڈیرہ بگٹی، کوہلو، بارکھان، سبی، لہڑی ٹی الیکشن ٹربیونل نا روشنی ٹی 29 پولنگ اسٹیشن تیا پولنگ 17 نومبر آ مریک ۔ الیکشن کمیشن گچین کاری تیٹی بشخ ہلوک آ اومیت دار و سیاسی جماعت آتے پارت کرینے کہ او پولنگ نا ایسری آن 48 گھنٹہ مست تینا گچین کاری مہم ءِ چٹفر ۔